top of page

Prof. Zoja Bozgo një emër që nuk do të harrohet lehtë


Prof. Zoja Bozgo një emër që nuk do të harrohet lehtë


Prof Dr Fatmir Terziu


Një lajm i dhimbshëm ka ardhur sot përmes mediave sociale për ndarjen nga jeta në moshën 89 vjeçare të Profesoreshës Zoja Bozgo. Ky lajm mbetet i tillë jo vetëm për të afërmit e saj, por dhe për qindra e qindra breza nxënësish e studentësh që mësuan matematikën me talentin e aftësinë e saj të veçantë. Zoja Bozgo, ishte vlerësuar me shumë çmime dhe ishte "Mësuese e merituar", por çmimi më i madh për një edukatore si ajo ishte dhe mbetet dashuria dhe respekti që ajo ndau me të gjithë.

Zoja Bozgo, e shkolluar për mësuesi në Rusi, e ardhur 60 e ca vjet më parë në Shqipëri, u befasua me traditën arsimore të Elbasanit, kryesisht përmes normalistëve-pedagogë, të gjimnazit ku punoi. Diplomohet në Universitetin shtetëror të Shën-Petërburgut, në fakultetin e matematikës. Kur vjen në Shqipëri fillon detyrën e pedagoges në Universitetin e Tiranës, në katedrën e matematikës. Në vitin 1976, me një urdhër "qarkullimi" do të vendoset në Elbasan, duke filluar punë në gjimnazin "Dhaskal Todhri", si mësuese e matematikës deri në daljen e saj në pension. Më pas do të jetë pedagoge e jashtme në Institutin e Lartë Pedagogjik. Me sjelljen e punën e saj shembullore, përcolli plot dinjitet një emër të mirë, me konsiderata të larta nga kolegët, nxënësit. Edhe sot e kësaj dite, sikurse nxënësit e mësuesit e gjimnazit, ruajnë kujtime nga më të mirat, si specialiste, metodiste, si njeri në kuptimin më të mirë të fjalës. Zoja Bozgo shquhet për mbështetjen dhe përkushtimin që tregon për nxënësit e talentuar. Njihte shumë mirë psikologjinë moshore. Ajo dinte jo vetëm shtyllat e lëndës ku duhet të mbahet nxënësi, por u tregonte edhe shkallët për t'u ngjitur hap pas hapi. Zojës i treteshin minutat pa u kuptuar, duke gozhduar vëmendjen e nxënësve, që bluanin operacione matematike me logjikën e tyre, mprehin aftësinë e gjykimit matematik. Me interesimin që u kushtonte nxënësve të talentuar, po me aq vëmendje punonte edhe për të njohur dobësitë e çdo nxënësi, po me aq saktësi përcaktonte "terapinë" dhe intensivisht i "ushqente" me material sipas programit. Ishte një metodiste e saktë dhe shumë punëtore. Asnjëherë nuk punoi për vete, por dha gjithçka për shkollën. Dha shembullin se si mund të dilet nga konformizmi burokratik në punën me talentet, duke u shkëputur nga format tradicionale të organizimit të punës me to; doli nga kornizat e programeve simbolike e akademike të rretheve jashtëshkollore. Gjeti forma të tjera nxitje e frymëzimi, duke ndryshuar pozitën e saj nga mësues- lektor, në udhëheqjen shkencore me bashkëpunëtorë. Kujtesa kolektive e nxënësve që mësoi dhe e mësuesve që bashkëpunoi, plotësojnë portretin e saj si mësuese e talentuar dhe qytetare e denjë. Mirënjohje për mësuesit e nderuar të qytetit tim!

Së fundi, dhe kjo pas viteve të monizmit, në periudhën e Demokracisë, ajo ishte dhe një nga gjashtë anëtarët e Komitetit ORSA. Pra, Zoja Bozgo, së bashku me Suzana Karagjozi, Diana Mitrushi, Arjana Risilia, Jana Mataj dhe Ilir Myteveli ishin drejtuesit e shoqatës së bashkëatdhetarëve rusë në Shqipëri.

Me ikjen e saj në amshim natyrshëm mbetet një pikëpyetje e madhe për të gjithë instancat vendore të të gjithë kohërave që nuk i dhanë asaj një vlerësim më të madh, qoftë duke e bërë Mirrënjohja e qyteteve ku ajo punoi me përkushtim, talent dhe zemër të madhe. Ajo ishte në thelb për ne, brezat që na mësoi jo thjesht mësuese dhe profesore e talentuar me një diadaktikë dhe pedagogji standarte të vlerësuar, por dhe vetë Urtësia e Fjalës. Për këtë përkushtimi poetik për të mbetet një arsye më shumë e respektit që ajo kishte dhe fitoi në kohë të ndryshme.




Urtësia e fjalës

(Në kujtim të Prof. së paharruar Zoja Bozgo)



Nga Fatmir Terziu


Fjalët e mia cilaten barierave të gjuhëve,

një barrë heq,

ndjehem më i lehtë,

prekja e librit këndjell:

"Thesari është brenda" i fshehtë

bota me ngjyra të ndezura thërret:

"Mos u mashtro nga nuri im!"


Drita e përskuqur në fytyrën time

pluskon nga qiriu i shpirtit tim. E ndjej,

ritualin e këshillës së largët,

zgjohem,

ngrihem,

ndizem,

qiri i lehtë, shkruaj mbi fletë:

Shtator deri në Qershor 1979-të - përreth fjalëve

Shtator deri në Korrik 1982 - përtej dritës së vërtetë

ngjashëm me një lugë kur bie në një qelq,

një zhurmërimë me trille,

brenda trupit tim dhe në sytë e mi shpërfillet,

zemra ime e ndjeshme jetike,

ka rreshtuar,

mbërthyer,

memorizuar

një aradhë të madhe matematike,

e hutuar gjatë gjithë natës,

së larguar,

jashtë trupit tim në materialin e memorjes imateriale

së bashku ka zbuluar,

një bllok shënimesh të gurtë,

në një ëndërr të gjatë, por reale

atë këshillë të ndjeshme, të urtë:

“Mësuesi ka një zemër të madhe!”



Shënim: Zoja Bozgo, "Mësuese e merituar"

978 views7 comments

7 Comments


Padyshim qe mesuese Zoja e meriton dedikimin tend Fatmir.


ismail Selita

Like

Xhilda Biçoku

Dedikim shume i bukur, i ndjere dhe i merituar! Qofsh e parajses teta Zoja!

Like

Fiora Cakoni

Faleminderit Fatmir. Nje dedikim i persosur dhe i ndjere per Zojen e mrekullueshme. Zoja ka nje vend special ne zemren time.

Like

dr Tatjana Ziu Ngushellime familjes!

Do ta kujtojme gjithmone me mall e respekt Profesoreshen tone te mrekullueshme, nje zonje e vertete, fisnike qe pergatiti breza te tere nxenesish, qe shkelqyen ne fusha te ndryshme. Kam qene me fat qe isha nxenese e saj. Do jete gjithmone ne zemrat tona.

Bravo Fatmir per kete dedikim te merituar per Prof. Zoja Bozgo.

U prehte ne paqe!

Like

Sanije Furrxhiu

Dedikim i merituar ! Ngushellime familjes !

Like

Shkrimet e fundit

fjalaelireloadinggif.gif
bottom of page