Viron Kona: “Fjala e lirë”, kuvend zemrash të bukura

Prof Dr Fatmir Terziu
Jun 27
2 min read

“Fjala e lirë”, kuvend zemrash të bukura

I nderuar miku im, Fatmir Terziu!

Të falënderoj nga zemra për përkushtimin e bukur që më bën me rastin e 75-vjetorit të lindjes. Ky përkushtim i sinqertë, është një dhuratë e vyer, mbresëlënëse dhe e paharruar, që i shtohet buqetës së ditëlindjes sime, si trëndafili më i bukur, plot aromë dhe freski. Gjithashtu, dëshiroj të them se urimi që më dedikon, më vjen nga një mik dhe një shokë i rrallë, i talentuar dhe me kontribute të mëdha në fushën e artit dhe të letrave shqipe.

Ta dish që çdo fjalë jotja, është e qëndisur me çiltërsinë e njeriut të vërtetë, të përkushtuar ndaj shoqërisë dhe miqësisë së sinqertë, të përkushtuar ndaj artit dhe letërsisë, ndaj Shqipërisë sonë të dashur.

Duke të shprehur mirënjohjen time, dëshiroj të them se ne që mblidhemi prej dekadash te “Fjala e lirë”, që ti drejton, ndihemi si në një kuvend zemrash të bukura, ne aty shkruajmë dhe përcjellim idetë, mendimet dhe mesazhet tona, të bindur se dëgjohemi dhe vlerësohemi, fjala jonë respektohet në radhë të parë nga ty, por dhe nga poetë, shkrimtarë, prozatorë, artistë dhe lexues të shumtë, që e gjallërojnë dhe i japin energji “Fjalës së lirë”.

Gjithnjë kam pasur bindjen se kuvendi ynë i “Fjalës së lirë, s`njeh as gardhe dhe as kufij, ai do të vazhdojë gjatë rrugëtimin e tij, sepse është shndërruar prej kohësh në një dritë - përhapës, por ai do të jetë edhe një dëshmi që do t`u përcillet brezave për t`u treguar fuqinë, energjinë dhe çiltërsinë e mendimit të lirë dhe të bukur shqiptar, do t`iu tregojë se, me sa etje dhe dashuri shqiptarët e lirë i kanë kënduar lirisë, demokracisë, traditave të vyera, folklorit, fjalës së bukur shqipe, gjuhës, publicistikës, artit, historiografisë...

Sa herë që ne dërgojmë artikujt apo krijimet tona te “Fjala e lirë”, të përfytyrojmë ty i dashur Fatmir dhe ndiejmë se mendimet, krijimet dhe mesazhet tona po ia themi apo po ia përcjellim një shoku të afërt, një shoku të mirë, ia shprehim një kuvendi të dashur dhe të besueshëm, që na respekton dhe na mirëkupton. Na vjen mirë që në krye të këtij kuvendi zemrash të bukura, je ti Fatmir, që mirëpret, respekton dhe përthithë idetë dhe ndjenjat e bukura që i japin “Fjalës së lirë”, energji të reja, ide, aroma, ngjyrime lirie dhe valëvitje të flamurit tonë kombëtar.

Duke të uruar ty sa më shumë shëndet, suksese dhe mbarësi në udhën tënde të ndritur e krijuese,

Me shumë respekt,

Miku yt,

Viron Kona

Tiranë, më 27 qershor 2025