TORA E ROTERDAMIT
Nga Luan Çipi
Kalëroj në lartësi,
Mbi një tore tjetër lloj,
Sodis gjatë, në thellësi:
Gjelbërim e ujë dalloj
Dhe godina me shumë kat.
Të mahnit pamja nga xhami,
Delta e lumit shtrihet gjatë,
Port i madh, ky Roterdami!
Anijet lundrojnë të qeta,
Në Evropë lumenjtë të çojnë,
Kudo pasurohet jeta,
Naftë e mallra transportojnë.
Tymi del përmbi oxhakë,
Ngjitet e plekset me retë,
Viti i Ri, troket në prag,
Shënon “Dymijenjëzet”!
Po, ç’kanë Franca dhe Holanda,
Pse se duan Shqipërinë?
Thjeshtë se nuk ua ka ënda...,
E harruan historinë?
Kohën kur, Gjergj Kastrioti,
I vu gjoks Evropës mbarë
Dhe, i dërguar nga Zoti,
Priu për mbi shqiptarë?!
*
Qielli ndrit nga fishekzjarrët
Dhe në shpirt na lind mendimi,
Do gëzojnë bashkëatdhetarët,
Gjallon shpresa dhe besimi!
Roterdam, 5 Janar 2020
