Sot dita e Shenjtërimit të Nënë Terezës

Sot dita e Shenjtërimit të Nënë Terezës

Sot përkujtohet kudo e ngado, dita e Shenjtërimit të Nënë Terezës. Kujtohet e festohet kjo ditë kushtuar misionares shqiptare. Asaj misionare jo thjesht nga humanizmi e sakrifica, por nga dedikimi që iu përkushtua ndihmës ndaj të varfërve. Prej asaj dite, kur ndodhi Shenjtërimi, në ligjin “Për festat zyrtare” në Shqipëri u zëvendësua festa zyrtare e datës 19 shtator që është Dita e Lumturimit të Nënë Terezës, më datën 5 shtator, që është Dita e Shenjtërimit të saj.

Pra është 5 shtatori 2016. Kjo datë kur Nënë Tereza fituesja e çmimit Nobel për Paqen, u shpall shenjtore. Më parë, Papa Françesku, njohu dy mrekullitë e saj, të shërimit të të sëmurëve pas vdekjes së saj më 1997. Prandaj, Nënë Tereza ‘u lumturua’ në tetor të vitit 2003. Ajo u lumturua nga Papa Gjon Pali II. Ai miratoi mrekullinë e parë pas vdekjes së saj. Një grua 30-vjeçare në Kalkuta tha se ajo u shërua nga një tumor në stomak pas lutjeve të Nënë Terezës. Një komitet i Vatikanit tha se nuk mund të gjente asnjë shpjegim shkencor për shërimin e saj dhe e shpalli atë një mrekulli.

Pak nga misioni

Misionarja shqiptare Agnes Gonxhe Bojaxhiu, lindi në Shkup, në vitin 1910. Më 1928 shkoi në Indi, ku në vitin 1948 ajo u bë një qytetare indiane dhe themeloi urdhrin e Misionarëve të Bamirësisë në Kalkuta, në vitin 1950, duke marrë famë për punën midis të varfërve dhe atyre që po vdisnin në atë qytet.

Për më shumë se 45 vjet ajo u shërbeu të varfërve, të sëmurëve, jetimëve dhe të vdekurve, ndërsa drejtoi zgjerimin e Misionarëve të Bamirësisë, fillimisht në Indi dhe më pas në vende të tjera, duke përfshirë bujtina dhe shtëpi për më të varfërit dhe të pastrehët.

Nënë Tereza vdiq më 5 shtator 1997, në moshën 87-vjeçare.

Në njohje të rolit të bamirësisë në zbutjen e krizave humanitare dhe vuajtjeve njerëzore brenda dhe midis kombeve, si dhe të përpjekjeve të organizatave dhe individëve bamirës, ​​duke përfshirë punën e Nënë Terezës, Asambleja e Përgjithshme e Kombeve të Bashkuara, përmes një rezolute, caktoi 5 Shtatorin, ditën e vdekjes së Nënë Terezës, si Ditën Ndërkombëtare të Bamirësisë.

Studiuesi më i dedikuar akademik Prof Dr Gëzim Alpion, tek Monografia “Nënë Tereza: Shenjtorja dhe Kombi i Saj” (Mother Teresa: The Saint and Her Nation) duke u vlerësuar ky libër në Amerikë me ‘Çmimin e Ekselencës në Botime’ për vitin 2023 në kategorinë e ‘biografisë’ nga Shoqata e Botuesve Katolikë, Association of Catholic Publishers (ACP) shprehet: „Mësimi më i madh nga Nënë Tereza: Të kemi më shumë respekt për njëri-tjetrin“.