Shpresa Fundi Gjergji: PENTAGRAM në BBR[1] – Ku arti flet me zë radiofonik

Në historinë e radios, kanë mbetur në kujtesë ato emisione që nuk janë mjaftuar të transmetojnë tinguj, por kanë ditur të krijojnë një dialog me shpirtin e dëgjuesit. Ato bëhen ura ku muzika, letërsia dhe mendimi takohen natyrshëm dhe e shndërrojnë valën radiofonike në një hapësirë kulture. Në këtë frymë vjen edhe "PENTAGRAM në BBR", një emision i ri në Bruko Broadcast Radio, por me një qasje të re në ide dhe përmbajtje. Ai synon të rikthejë vëmendjen te fjala artistike dhe te fuqia e saj për të bashkëjetuar me muzikën. Përmes dy moderatorëve, programi fiton një ndërthurje dinamike ku bashkohen dy individualitete krijuese.

I konceptuar dhe i moderuar nga Vaskë Bruko dhe Dr. Shpresa Fundo Gjergji, emisioni nuk mbështetet vetëm mbi "pentagramin" muzikor (repertorin muzikor të BBR), një fond tashmë i shkëlqyer. Ai ndërton një komunikim më të thellë me dëgjuesin, duke e vendosur muzikën në dialog me prozën, poezinë, reflektimin dhe rrëfimin. Kështu, çdo krijim prozaik e poetik bëhet pikënisje për një përjetim të ri artistik, ku fjala nuk shpjegon muzikën, por ecën krah saj, duke i dhënë një dimension tjetër emocioneve që ajo zgjon.

Në një kohë kur komunikimi publik shpesh dominohet nga ritmi i shpejtë i informacionit, ky format zgjedh t'i japë hapësirë reflektimit, ndjeshmërisë dhe përjetimit artistik. Ai i rikthen rëndësinë dëgjimit të vëmendshëm, meditimit dhe kënaqësisë estetike që lind nga ndërthurja e arteve. Në këtë kuptim, "PENTAGRAM në BBR" nuk është vetëm një emision radiofonik, por shndërrohet në një laborator krijues, ku muzika dhe letërsia ushqejnë njëra-tjetrën. Ai e fton dëgjuesin të ndalet, të dëgjojë dhe të përjetojë dialogun mes muzikës dhe fjalës.

Me "PENTAGRAM në BBR" radioja vazhdon të dëshmojë se është një institucion kulturor.

Në epokën e platformave digjitale dhe konsumit të shpejtë të përmbajtjes, kësisoj radioja mbetet një nga mjediset më intime të komunikimit. Zëri, i çliruar nga imazhi, i lë vend imagjinatës së dëgjuesit dhe e fton atë të ndërtojë vetë peizazhet, fytyrat dhe emocionet. Pikërisht kjo liri e bën BBR një strehë të veçantë për letërsinë dhe muzikën, dy arte që jetojnë edhe përmes ndjesisë dhe jo vetëm përmes shikimit.

Gjithashtu, do të shtoja se kuptimi i titullit "PENTAGRAM" sjell një dimension simbolik, ku nuk është rastësi që emisioni mban këtë emër. Në gjuhën e muzikës, pentagrami është vendi ku notat marrin formë dhe kthehen në melodi. Në këtë program ai shndërrohet në metaforën e një hapësire, ku krahas notave, vendin e tyre e gjejnë edhe fjalët, kujtimet, poezia dhe rrëfimi. Pra, "PENTAGRAM në BBR" sjell edhe përjetime njerëzore dhe prezantohet si një format i ri kulturor në Bruko Broadcast Radio.

Krijimtaria autoriale që ndërton boshtin e emisionit nuk synon të jetë thjesht shoqëruese e këngëve. Ajo nënkupton krijime të frymëzuara nga tingulli, kujtesa, përvoja njerëzore dhe universi i emocioneve. Poezitë, prozat poetike, meditimet dhe rrëfenjat krijojnë një mozaik ku dashuria, malli, koha, humbja, shpresa dhe dinjiteti njerëzor shfaqen si tema universale që i japin jetë artit.

Një vend të veçantë në këtë mozaik zënë edhe vetë peizazhet e vendit tonë, jo vetëm si hapësirë gjeografike, por si trashëgimi shpirtërore. Traditat, zakonet, natyra dhe rrëfimet bëhen pjesë e rrjedhës artistike të emisioneve episodike. Kjo nuk vjen si nostalgji dekorative, por si një përpjekje për të ruajtur vlera kulturore shqiptare dhe për t'i sjellë ato në gjuhën e ndjeshmërisë bashkëkohore.

Një tjetër vlerë e këtij projekti është vetë ideja e arkivimit të krijimtarisë. Çdo episod i "PENTAGRAM në BBR" mbetet pjesë e fondit kulturor të radios, duke krijuar një pasuri që nuk matet vetëm me minutazhin e transmetimit, por me gjurmën artistike dhe vlerën trashëgimore institucionale të vetë radios. Në këtë mënyrë, radioja fiton një funksion që shkon përtej informimit dhe argëtimit. Ndoshta arti nuk ka nevojë gjithmonë për skena të mëdha. Ndonjëherë mjafton një zë, një melodi dhe një fjalë e thënë me ndjenjë që të krijohet ai takim i rrallë mes krijuesit dhe dëgjuesit. Kur kjo ndodh, radioja pushon së qeni thjesht medium; ajo bëhet kujtesë, kulturë dhe shoqëruese me zë të veçantë në jetën tonë.

Në fund të fundit, "PENTAGRAM në BBR" dëshmon se arti nuk jeton i ndarë në zhanre. Muzika, letërsia dhe fjala, në rastin tonë përmes Bruko Broadcast Radio, bëhen pjesë e një përvoje shpirtërore me zë dhe emocion. Kur ato bashkohen me krijimtarinë artistike lind një hapësirë ku dëgjuesi nuk mbetet vetëm spektator, por bëhet bashkudhëtar në këtë udhëtim radiofonik.

Në një peizazh mediatik ku shpesh mbizotëron e përkohshmja, nisma të tilla dëshmojnë se radioja vazhdon të ketë fuqinë të krijojë kulturë, të sjellë emocione dhe të mbjellë farën e bukurisë krijuese.

Shkruar nga Dr. Shpresa Fundo Gjergji

[1] https://youtu.be/Obax4-lJ9yc?si=Y89yAvZEhbgjBaQf