Lumnie Thaçi Halili: Takimi Përurues me rastin e 25 vjetorit të Shtëpisë Botuese URA

Faleminderit që e ndatë me ne këtë Festë Libri!

Dje, në Bibliotekën Kombëtare të Kosovës, u mbajt Takimi Përurues me rastin e 25 vjetorit të Shtëpisë Botuese URA.

Në këtë ngjarje u përuruan tre autorë të njohur nga Shqipëria: Sulejman Mato, Thanas Medi dhe Ymer Çela me veprat e tyre më të reja, botuar nga URA.

U prezantuan gjithashtu edhe veprat e Fatmir Terziut, Arben Iliazit, Odise Plakut dhe Adrian Jorgjit, të cilët nuk mund të ishin të pranishëm, por që ndanë me ne fjalën dhe frymën e tyre krijuese.

Takimi u nderua me praninë e shumë personaliteteve të njohura të kulturës e të artit nga Kosova, si dhe me pjesëmarrjen e Shkëlqesisë së Tij, Ambasadorit të Shqipërisë në Kosovë, z. Petrit Malaj, i cili mbajti një fjalë të ngrohtë e vlerësuese për veprimtarinë e Botimeve URA dhe rolin e tyre në forcimin e urave kulturore mbarëshqiptare.

E falënderojmë sinqerisht Shkëlqesinë e Tij për fjalët mbështetëse dhe për praninë e çmuar në këtë përvjetor të veçantë!

Ky përvjetor shënon një çerek shekulli krijimtarie, përkushtimi dhe urash letrare, që bashkojnë autorë, lexues e kultura nga të gjitha trevat ku jetojnë shqiptarët.

Në emër të Shtëpisë Botuese URA, shprehim mirënjohjen tonë më të thellë për çdo pjesëmarrës që e ndriçoi këtë ditë me praninë e tij!