Kur tjerrte nata si tezgjah

Drita Çomo

Kur tjerrte nata si tezgjah

(Në kujtim të Drita Çomos, poetes brilante që vdiq e dashuruar me poezinë.)

Fatmir Terziu

Ti u dashurove natën e dashur. Erësira

zgjatej mbi qytet si tezgjah,

duar të errëta si nata

askush nuk tjerrte veç ata;

asnjëri nuk të pa,

veç një yll me pesë cepa në mes të Cërrikut

krekosej si një gjel në majë të furrikut.

Po ja që ky yll i këputur,

i ngulur me beton në asfalt

ra papritur në mes sheshit i drobitur

dhe tregoi çdo gjë për atë natë.

Dhe vetë mallkimi mbiu mes njerëzve

udhëtoi nën dhëmbë një kohë të gjatë

mallkoi atë udhë të pështirë të tjerrësve

që edhe dashurinë ta vranë.

Po cilën dashuri e dashur Dritë?

Vërtet cilën dashuri?

Ti u dashurove vetëm me poezitë

e përqafuar mbete vetëm në poezi

se me poezi doje t’ja bëje natën ditë

atij që e doje aq shumë, të pavdekshmit Njeri!

Shënim: Drita Çomo lindi në Tiranë, më 1958. Në nëntor të vitit 1960, në moshën dy-vjeçare, internohet për shkak të dënimit politik të nënës së saj, Liri Belishovës. Babai i saj, Maqo Çomo, u dënua dhe ridënua nga regjimi komunist. Një pjesë të fëmijërisë dhe të adoleshencës Drita e kaloi e internuar në Kuç të Vlorës, më pas në Progonat të Kurveleshit. Së fundi e internojnë në Cërrik, ku edhe mbaroi shkollën e mesme, por për arsye të sëmundjes së pashërueshme si dhe të një keqdashjeje politike, u pengua në mbrojtjen e maturës. Sëmundja avancoi dhe, më 19.02.1981, në moshë fare të re, vdes në spitalin onkologjik të Tiranës. Në momentet tragjike të ditëve të fundit të jetës nuk iu lejua të kishte pranë as nënën, dhe deri në grahmat e vdekjes ajo mbeti e vetme.