Halil RAMA: ”SARINA 2002…!

REPORTAZH

SA SHUMË EKSELENTË TEK ”SARINA 2002…!

Halil RAMA – Mjeshtër i Madh

Çaste vërtetë emocionuese teksa mësojmë se një e treta e 81 maturantëve të kësaj shkolle janë ekselentë, rezultatet e shkëlqyera të të cilëve i çertifikojnë mësues shembullorë

Nxënësit që mbarojnë gjimnazin pranë kësaj shkolle janë fitues në degët më të kërkuara të universiteteve tona, si në mjekësi, inxhinieri  komjuterike dhe Ndërtimi, Shkencat Shoqërore dhe Ekonomike, etj.  Gjithashtu janë dhjetra nxënës që kanë mbaruar gjimnazin në këtë shkollë që studjojnë në universitete të njohura jashtë vendit, si në Gjermani, Angli, Itali, Kanada, Amerikë, etj

Ceremonia e finalizimit të tre viteve mësimore, ose e përmbylljes së maturës, mbrëmjen e së shtunës të 31 majit 2025, për 81 maturanët e katër klasave të Shkollës Jopublike “Sarina 2002”, për prindërit e mësuesit e tyre, dhuroi vërtetë çaste të magjishme.

Në fillim, shfaqja e një dokumentari që flet për rritjen cilësore e sasiore të këtij institucioni prestigjioz arsimor në 23 vite që nga krijimi, ndër më konkurruesit në rang vendi, më pas atmosferën e ndez grupi i valltarëve të Ansamblit Artistik  “Hazis Ndreu”- Nderi i Kombit.

Në këtë atmosfere festive të mbushur me emocione, krenari dhe pozitivitet, moderatori Defrim Methasani thërret një e nga një maturantët si në apelin e një fillim ore mësimi, nga mbiemrat e tyre (Çollaku, Agolli, Teqja, Lelaj, Marku, Baqoshi, Kotarja, Lila, Pashaj, Nezaj, Burgaj, Pirko, Harizaj, Bejko, Picari, Lelaj, Betoja, etj etj), gjithkush mëson se ata janë nga e gjithë Shqipëria.

Dhe siç shprehet bashkëmoderatorja Adela, (ish-nxënëse shembullore e kësaj shkolle), sot zemrat e këtyre maturantëve rrahin ndryshe; jo nga emocionet e një testi, as  nga zhurmat e pushimeve mes orëve, por nga gëzimi e mallëngjimi që sjell ky moment. Ka të drejtë Adela, sepse ka qenë një rrugëtim i gjatë, me netë pa gjumë, të qeshura pa fund, momemte që s’do ti harrojnë kurrë dhe mësime që nuk ishin vetëm në libra. Sepse këtu te “Sarina 2002” ata kanë mësuar çdo të thotë të rritesh bashkë.

Drejtoresha e gjimanzit  Blerina Nasto, ndërsa uron maturantët për sukseset e arritura, shpreh mirënjohjen e saj ndaj prindërve dhe stafit pedagogjik për mbështetjen dhe përkushtimin e tyre të vazhdueshëm, që kanë kontribuar në arritjen e këtij momenti të rëndësishëm. Ajo inkurajoi maturantët të vazhdojnë të ndjekin ëndrrat e tyre dhe të mos ndalen kurrë së kërkuari njohuri dhe përvoja të reja. Maturantët i uroi gjhithashtu edhe drejtori i 9-vjeçares Sherif Koldashi si dhe Halit Hoxha nga ZVA Vorë.

URIMI I PRESIDENTIT TË “SARINA 2002” LIMAN HOXHA

Liman Hoxha, themelues dhe president i kësaj shkolle që me arritjet dhe përvojën prej afro çerekshekulli ka fituar titullin “lider” në arsimin jopublik shqiptar, nuk e fsheh gëzimin në sytë e tij tek sa uron maturantët për sukseset e tyre, duke theksuar rëndësinë e përkushtimit dhe punës së palodhshme që kanë treguar gjatë viteve të shkollimit. Ai gjithashtu nënvizoi rolin e rëndësishëm që mësuesit e “Sarina 2002” kanë luajtur në formimin e tyre gjatë procesit mësimor-edukativ.

I lumtur që ka arritur të sigurojë një mjedis të favorshëm për zhvillimin e aftësive dhe talenteve të tyre, ai e konsideron nder dhe privilegj që të qëndroj para një gjeneratë e cila me përkushtim të madh ka arritur që sot të ketë një moment të veçantë.

 “Në përmbyllje të këtij cikli të shkollimit tuaj, përkatësisht përfundimit të maturës, është koha për të menduar për fillimin e një cikli të radhës, për t’i ndjekur ëndrrat tuaja të cilat janë vërtet reale dhe të arritshme. Kam bindjen se pas këtij momenti ju do ti bashkoni ambiciet, këmbënguljen dhe pritshmëritë tuaja në interes të vizionit se ku do të jeni pas 5 apo 10 viteve, si do të arrini atje dhe çfarë do të bëni”, tha ndër të tjera Presidenti Hoxha.

Ceremonia vazhdoi me ndarjen e certifikatave për maturantët e dalluar, të cilët u vlerësuan për arritjet e tyre të jashtëzakonshme. Prindërit dhe familjarët përjetuan momente emocionuese teksa shikonin fëmijët të çertifikonin arritjet e tre viteve mësimore, një dëshmi e punës dhe përkushtimit të tyre ndër vite.

Moment tejet emocionues, hedhja e kapeleve në hapësirën e oborrit modern të shkollës dhe bashkimi me prondërit e mësuesit e tyre.

KARAKTERISTIKAT E 28 MATURANTËVE EKSELENTË

Në fillimin e këtij viti kur unë shkrova dhe botova reportazhin “Sarina 2002’, lider në arsimin jopublik shqiptar”, e para që më uroi qe mbretëresha e skenës dhe ekranit, (që fatkeqësisht nuk jeton më) Margarita Xhepa – Nderi i Kombit. Dhe e dini se çmë tha?!

“Kam qenë e ftuar në disa shkolla thuajse në gjithë vendin, por askund nuk jam mrekulluar si te ‘Sarina 2002’, ku Liman Hoxha ka investuar mençurinë dhe vizionin e tij bashkëkohor në krijimin e kësaj shkolle ndër më modernet, dhe ku shumica e nxnënësve janë ekselentë”.

Gjashtë muaj më pas ndjeva të njejtat emocione, teksa moderatori i shumëtalentuar i kësaj ceremonie, Mjeshtri i Madh Defrim Mathasani, ndërsa i thirrte në skenën gjigande, lexonte edhe karakteristikat (vizuale dhe të karakterit) të 28 maturantëve ekselentë. Ja disa prej tyre:

Anja Çollaku – Shumë paqësore, e qeshur, e qetë; Fatime Dervishi – strikte, serioze; Lorena Kupa – e gjallë, plot energji; Arsia Teqja -  lozonjare; Rubina Koltraka – e urtë, vëzhguese e mirë;  Amarildo Peca -  i urtë, i ndrojtur, i sjellshëm; Flavia Hoxha –e qeshur, e ëmbël, shumë pozitive; Ester Bejko – e dashur; Klea Marku – shumë, shumë e urtë dhe me talent në pikturë; Lela Lelaj – ambicioze, kërkuese; Ilkea Agolli -  rikthyer pas studimeve në Hollandë, e qeshur, e çiltër; Klea Baqoshi – këmbëngulëse dhe kërkuese; Kejsi Tanushi – energjike; Leonora Qenani – e sinqertë, kreative, interpretuese e mirë; Sasha Kotarja – energjike, detajiste, i pëlqen arti në përgjithësi; Ersona Hoxha – e gjendur për shoqërinë, e qeshur dhe shumë e mirëkuptueshme; Xhesika Disha – e përkushtuar për t’i çuar deri në fund detyrat që i ngarkohen;  Mirjeta Shira – qetësi olimpike, e sjellshme; Neda Lilaj – e ndjeshme, shumë e qetë në komunikim; Aishe Shehu – pozitive dhe e qeshur, shumë sociale; Enxhi Lala – di të vendosë balanca shumë të mira, e përkushtuar në mësime; Fatjona Hafuzi – e afrueshme, e sjellshme; Hatixhe Lilaj – ka sy shprehës, e çiltër, pozitive; Klea Robi – e sjellshme, por pak nevrike; Gledia Balla – kryetare e qeverisë së nxënësve, shumë e talentuar në pikturë; Irena Tota – e zellshme për punë dhe e qetë; Linda Pashaj – e urtë, e përqëndruar, fjalëpak; Enxhi Muça – dëgjuese dhe vëzhguese shumë e mirë…

Çaste vërtetë emocionuese teksa mësojmë se një e treta e 81 maturantëve të kësaj shkolle janë ekselentë, rezultatet e shkëlqyera të të cilëve i çertifikojnë mësues shembullorë.

Nga kjo ceremoni mësojmë për përkushtimin dhe përkujdesjen e mësuesve kujdestarë, përkatësisht të klasës 12 A Fatmir Hoxha; 12 B Zyri Zavalani, 12 C Medina Sakajani dhe 12 D Shkëlqim Çollaku si dhe të mësuesve të lëndëve përkatëse:  Myftar Veli (letërsi), Fadil Vukaj (fizikë), Zyri Zavalani (gjeografi), Kozeta Teme (ekonomi), Flogerta Banaj (anglisht), Brunilda Reçi (filozofi), Elenika Kavaja (letërsi), Suela Aliaj (Biologji), Irena Molla (gjermanisht), Erjola Muça (histori), Lubjana Koltraka (Edukim fizik), Matilda Guci (anglisht), Fatmir Hoxha (matematikë), Niko Kaci (kimi) dhe Bamiela Sulollari (psikologe).

Fjalë zemre të ndërsjellta mësues-nxënës që do të mbeten gjatë në kujtesën e tyre.

MIRËNJOHJE PËR SHEFIN E KULTURËS

TË SHKOLLËS AZEM TETA

Nxënësit e kësaj mature, kurrësesi nuk do të harrojnë që krahas realizimit me sukses të programit mësimor edukativ në të gjitha ciklet, Shkolla jopublike “Sarina 2002” ka zhvilluar veprimtari të larmishme kulturore artistike. Realizimi i tyre me cilësi e kreativitet ka një emër. Ai është muzikanti dhe piktori i talentuar Azem Teta. Pjesëmarrës në stafin pedagogjik të kësaj shkolle që nga vitit 2002 (ndërsa pret t’i bashkohet familjes së tij në SHBA), Ai do të vlerësohej me Çertifikatë Mirënjohje, nga Presidenti i shkollës Liman Hoxha, pikërisht në këtë cemoni të kësaj mature. Ky vlerësim, për faktin se ka qenë evident kontributi i tij në gjallërimin e jetës kulturore - artistike në shkollë, veçanërisht në organizimin e veprimtarive në ditë të festave kombëtare, por edhe në Ditë të veçanta Ndërkombëtare.

Ndërkohë që me vizionin e talentin e tij, Azem Teta ka qenë prezent edhe në organizimin e aktiviteteve kulturore – artistike (të organizuara në klube lëndësh).

Në kuadër të veprimtarive të organizuara për 80 – vjetorin e çlirimit të Atdheut dhe Ditën e Pavarësisë se Shqipërisë në këtë shkollë perfundoi puna për ekspoziten me punime të nxënësve të shkollës, punime që kishin në qender patriotizmin, atdhedashurine dhe ndjenjen e krenarisë për Atdheun. Mësuesi Azem Teta i konsideron këto një shkëlqim të merituar të nxënësve të shkollës “Sarina 2002”, të cilët nëpëmjet mësimit dhe veprimtarive bënë të mundur këto vlerësime në prag të dy festave të mëdha aq të dashura për to. Po ashtu, krahas presidentit Liman Hoxha, ai ka qenë interlekutor i realizmit të takimeve me nxënësit e kësaj shkolle, të ikonës së kinematografisë e të teatrit Margarita Xhapa, si dhe me një nga aktorët më të mëdhenj të kinematografisë shqiptare, Mjeshtrin e Madh Timo Flloko.

PSE PRINDËRIT ZGJEDHIN TI SHKOLLOJNË FËMIJËT E TYRE TE “SARINA 2002”?

Sepse në 23 vjet që nga themelimi, kjo shkollë që ndodhet në Fushë Kashar, Autostrada Tiranë – Durrës, kilomentri i parë përballë “Vodafone”, është bërë ndër më të suksesshmet në rang kombëtar. Duke pohuar se këtu janë shkolluar deri në mbarimin e gjimnazit dy vajzat e tij të mrekullueshme, moderiari i këtij eventi Defrim Methasani vlerëson jo vetëm pamjen e jashmte por mjediset e këtij kompleksi arsimor modern, të standardeve më të përparuara arsimore, me klasa moderne, laboratorë, palestra e terrene të reja sportive.

Në këto 23 vite kjo shkollë ka 15 fishuar numrin e nxësëve dhe ka arritur rezultate të shkëlqyera, si fituese olimpjadash në lëndë të ndryshme dhe duke qenë fituese edhe në aktivitete artistike sportive.  Aktualisht kjo shkollë ka 300 nxënës në ciklin e ulët, 270 nxënës në ciklin e ulët të mesëm dhe 230 nxënës në gjimnaz.

Rezultatet inkurajuese të Shkollës 12-vjeçare jopublike “Sarina 2002” me eksperiencë 23 – vjeçare, “Lider në edukim dhe mësimdhënie”, me kushte shumë të mira mësimdhënie dhe studimi dhe me programe të miratuara nga Ministria e Arsimit dhe Sportit, parasëgjithash i dedikohen një stafi të kualifikuar mësuesish.

44 mësues të lëndeve të ndryshme (nga cikli i ulët deri në gjimnaz) shërbëjnë këtu si modele të profesionalizmit, ndershmërisë dhe përkushtimit ndaj nxënësve.

Presdienti i Shkollës Liman Hoxha, pohon se përzgjedhja e stafit pedagogjik është bërë gjithnjë me konkurse të rregullta sipas standardeve të njohura ndërkombëtare dhe rregulloreve të miratuara nga Ministria e Arsimit.

Limani, që në përditshmërinë e jetës është një nga figurat më interesante, si përfaqësues dinjitoz i elitës intelektuale dibrane në metropolin shqiptar, flet për mësues që reflektojnë personalitetin e  tyre si edukator shembullorë për 800 nxënësit e prindërit e tyre si dhe për shembujt pozitiv të mësimdhënies. Duke aplikuar metodologji të përparuara mësimdhënieje, shkolla “Sarina 2002” është bërë më e dashura për nxënësit e saj dhe për prindërit e tyre, me të cilët mbahen kontatkte të rregullta takimi e konsultimi.

Shkolla jopublike“Sarina 2002” u krijua dhe u rrit cilësisht, jo vetëm falë rolit të madh të mësuesve të përkushtuar, por edhe falë kontributit të Presidentit të saj, Liman Hoxha, njeri i veçantë, energjik, në sjellje e qëndrime, personaliteti i të cilit  kudo dhe në çdo rrethanë reflekton mirësi dhe vlera. Këtë vlerësim e shprehin mësuesit, nxënësit, prindërit si dhe drejtorët ndër vite të saj, të mirënjohur për kontributin në fushën e arsimit në rang kombëtar: Besim Toçi, Qazim Karaj e Halil Begu, Sherif  Koldashi e Blerina Nasto.

Në shkollën “Sarina 2002” është sfiduese, të mësuarit e bazuar në projekte si një nga metodat më motivuese dhe më efektive për të mësuar. Gjithkush do të mrekullohej me realizimin nga nxënësit e kësaj shkolle të projketeve të tilla si “Traditat dhe Metropoli/ Bashkëjetesë në diversitet”, etj.

Nxënësit që mbarojnë gjimnazin pranë kësaj shkolle janë fitues në degët më të kërkuara të universiteteve tona, si në mjekësi, inxhinieri  komjuterike dhe Ndërtimi, Shkencat Shoqërore dhe Ekonomike, etj.  Gjithashtu janë dhjetra nxënës që kanë mbaruar gjimnazin në këtë shkollëqë studjojnë në universitete të njohura jashtë vendit, si në Gjermani, Angli, itali, Kanada, Amerikë, etj.

Bazuar në këto arritje, Presidenti Hoxha dhe stafi pedagogjik synojnë që edhe me përfundimin e kësaj mature nxënësit  e kësaj shkolle të fitojnë degët më të mira brenda dhe jashtë vendit tonë.