Fatmir Terziu: U zgjuam!

Sipas dëshirës. Nuk dua t'ua trazoj as gjumin, as qetësinë, as përkushtimin, as …asgjë nga këto dhe nga të tjerat miqtë e mi. Thjesht po mbaj dhe unë (a)radhën për këtë stacion…, nëse dëshironi ndaloni dhe ju, hidhni një sy a një shikim dhe .. pastaj e dini vetë në se doni të zgjoheni. Ju falenderoj nga zemra dhe ju përshëndes si ngahera: Fatmir Terziu.

TABELA E SHUMËZIMIT

Të mësohet numër pas numri

kusur i madh

fluturon me erën që shpërndan qeset e Tregut

me dihamat që bien si vargje të tëra,

fjalë që zhduken mbi taka,

në ijë të zeros.

INKUIZICIONI I FARAVE TË LULEDIELLIT

Nuk mundet të ishte ndryshe

teatri do të mbetej

pa (punë)

e kisha fjalë për pastruesen

jashtë vetvetes

dhe në mëngën e të bardhës

një rrjedhje rrezatimi imagjinar

të inkuizicionit

të humorit

për farat e lulediellit.

EKRANI I TELEVIZIONIT

Dhe kur të biem përsëri në gjumë

të gjithë fillojnë të ëndërrojnë për të

qau fëmijë

zgjim përtej së vërtetës:

Dhoma e Bardhë Rustike

strehon kujtesën e jetës.

KOTËSIA

Strehohet larg, por jeton afër

rrethim në oborrin tim të përparmë.

Unë e zbraz pastër

në të gdhirë…

Ajo po gdhihej tani

po vinte si një re nga bregu

ishte një nga ato

gjëra.

SHPRESA VDES ME KONSTRUKSION

Fletorja verore

është një konstruksion

për çdo situatë

sepse trajektorja është

hapësirë ​​iluzore

që vdes me konstruksion.

LUMTURIA PAS ZGJIMIT

…Pastaj

portierët

na i grisën biletat e filmit.

Isha i lumtur deri në cep,

në buzët e tua.

Unë jam një ëndërr tani.

PËRDITËSIA E PËRDITËSISË

Dhe drita. Dhe dita. Dhe…

...dhe zëri vjen

si shpresa dhe besimi për zjarrin

kur numërojmë

pa numëruar

ditët

që kalojnë përtej ditëlindjes

së përditshme.

U zgjuam!