Fatmir Terziu: „Sytë e Gruas“ ose magjia e diskursit të vëzhgimit poetik të një gruaje

„Sytë e Gruas“ ose magjia e diskursit të vëzhgimit poetik të një gruaje

Doli nga botimi vëllimi poetik i katërt i poetes së talentuar Arjana Fetahu Gaba. Një vëllim me poezi të përzgjedhura nga një thesar të krijuar në vitet e fundit, që përbëjnë sasinë dhe cilësinë e mbetur edhe të dy vëllimeve të tjera. Kështu me këtë libër poetja na shpie në një sitë të tendosur të retinës, me atë që Zoti i ka falur një gruaje poeteshë, me sytë e saj të depërtueshëm e zhbirrues në tërësinë disimitrike të diskursit të jetës.

„Sytë e Gruas“ nuk është thjesht një vëllim i ri poetik i poetes Arjana Fetahu Gaba, por është një diskurs poetik i dashurisë që vjen e zanafillet nga sytë e gruas. Si një diskurs i tillë është dije, është një udhëtim, është një kështjellë me shumë dyer dhe shumë dritare. Ne mund të hyjmë në dashuri nga shumë kënde, por dashuria nga sytë është treguesi i vërtetë, se jo më kot themi se sytë nuk të gënjejnë. Mes syve ne mund të ecim nëpër shumë korridore, mund të hapim shumë dyer. Nëse do ta gjejmë atë që kërkojmë pas tyre, varet vetëm nga ne. Secili prej nesh i njeh dashuritë e veta, secili prej nesh vuan nga mangësitë e veta. Sa herë që e shqyrtojmë dashurinë, mjaftueshmërinë ose pamjaftueshmërinë e saj, pasurinë e saj, emocionet që na jep, mënyrën se si arrijmë të bashkëjetojmë së bashku, kuptojmë se është diçka që na rëndon, dashuria jonë, ose e dikujt tjetër, ose na jep mundësinë të marrim frymë - na hap kraharorin, na hap secilën nga alveolat në mushkëri, duke na ngulur thellë në zemër gjilpërën e adrenalinës që na hedh në një dimension krejtësisht tjetër.

Dhe në këtë vëllim është tërë diskursi i metuar poetikisht dhe profesionalisht. Arjana Fetahu Gaba është seleksionuesja e risive të tilla. Në këtë vëllim është thelbi. Thelbi dhe konteksti i varur nga sytë që dashurohen me librat, sytë që anojnë nga muzika, miqtë, udhëtimet, nga ndryshimi, diversiteti, tejkalimi i kufijve, nga bukuria, sytë që i bëjnë gratë të jenë gra me vullnet e pasion, sytë e gruas që njohin dhe prezantojnë kënaqësitë. Në këto sy zbulohet edhe empatia, njerëzimi, mirësia, drejtësia, e vërteta, sinqeriteti, dashuria, përqafimet, puthjet, prekjet, nga lehtësia e të qenit, ëndrrat, respekti, historia, trillimi, realiteti, gëzimet e vogla të përditshme, nga shikimi i një personi që të do dhe të vlerëson, nga dora e një miku të shtrirë në nevojë.

Në këtë vëllim „Sytë e gruas“ janë të gjitha labirinthet që dalin. eemetohen nga dimri, pranvera, vjeshta dhe vera, nga kujtimet e së kaluarës dhe të ardhmes së mundshme, nga deti, nga ishujt, nga farët, nga malet, nga hëna dhe dielli, nga yjet dhe retë, nga bluja dhe e zeza, nga zbulimi, nga mençuria në fjalë, nga jeta e ngadaltë dhe realizimi i shpejtë, nga çdo ditë e re dhe çdo natë e përbashkët, nga jeta dhe vdekja. „Sytë e gruas“ është edhe Fier, edhe Durrës, edhe Shqipëri edhe Kosovë, edhe Çamëri, është i gjithi një tërësi dashurish. Lexues i dashur është në dorën tënde që ti të përzgjedhësh.