Fatmir Terziu: Në zemër të Shebenikut tek Vila e Shahinajve

Fatmir Terziu: Në zemër të Shebenikut tek Vila e Shahinajve që po ringjall Fushë Studnën

Në Fushë Studnën e qetë, ku mëngjeset lindin ngadalë mbi malet e Shebenikut dhe era sjell aromën e pyjeve me një finesë që rrallë gjen sot, një vilë e re moderne tërheq vëmendjen e çdo vizitori. E ndërtuar nga bashkëshortët Lulzim dhe Lulka Shahinaj, ajo qëndron krenare mes ndërtimeve tradicionale, si një urë mes së resë dhe së vjetrës, mes të ardhmes së turizmit dhe rrënjëve të zonës.

Në Fushë Studnën, ku qetësia herë duket se e mbulon çdo tingull njerëzor, e herë thyhet nga zhurma e përrenjve të akullt që zbresin nga mali, kjo vilë nuk është vetëm një investim privat; është një ogur i mirë për një zonë që prej vitesh kërkon të zhvillohet ngadalë, me hapa të sigurt.

Shtëpia që ngroh turistët dhe shpresat e komunitetit

Në hyrje të vilës, ngrohja e brendshme, hapësira e bollshme dhe pajisjet moderne krijojnë një kontrast të bukur me natyrën e egër përreth. Kuzhina e pajisur plotësisht, ambientet komode dhe elementet arkitektonike të frymëzuara nga tradita, e bëjnë akomodimin jo thjesht të rehatshëm, por përjetim më vete.

Turistët — të pakët për momentin, por gjithnjë e më të interesuar — gjejnë këtu jo vetëm një vend për të fjetur, por një strehë ku i nxehen duart pas orëve të gjata nëpër shtigjet e Shebenikut.

“Ne donim të sillnim një standard të ri në këtë zonë që ka kaq shumë për të ofruar,” thotë Lulzim Shahinaj. Dhe ndërsa ai flet, vështrimi i bie diku në horizont, aty ku mali duket se preket me dorë.

Shebeniku — pasuri e madhe, vizitorë të pakët

Brenda Vilës

Parku Kombëtar i Ekosistemit Shebenik–Jabllanicë është një botë më vete. Liqenet karstike që vezullojnë në verë, pyjet me bredh e ah, fshatrat e braktisur e shtëpitë trekatëshe me gurë të lëmuar nga koha — të gjitha krijojnë një mozaik të rrallë natyror dhe kulturor.

Turistët që mbërrijnë këtu janë shpesh të vetë-organizuar, të etur për aventura që nuk i gjejnë në destinacionet e zakonshme. Ata vizitojnë Llangën me shtëpitë karakteristike, kishën e hershme të Koshorishtit — një relike e ngritur në një shpelle që i reziston kohës prej shekullit II para erës sonë — liqenin e Fushë Studnës, Vlashkën, Bredhin e Fushë Kuqes, Shkallën e Skënderbeut, Gurrën e Ariut, e shumë mrekulli të tjera të mbetura në harresë.

Dhe megjithatë, ajo që e gjallëron vërtet zonën janë festat tradicionale. Festa “Dorez”, Shëngjergji në Steblevë, festat e Qarrishtës, Lunikut e Rrajcës — ngjarje që mbledhin komunitetin, të afërmit, emigrantët që kthehen dhe të huajt që kërkojnë të prekin kulturën nga afër. Këngë, valle, kostume popullore që ndryshojnë nga fshati në fshat — një traditë që endet si një fill i fortë përmes brezave.

Lulzim Shahinaj — nga Elbasani në zemër të Gollobordës

Pas këtij investimi qëndron figura e Lulzim Mustafa Shahinajt — inxhinier sizmologjie, ish-nënkryetar i Bashkisë Elbasan, drejtues institucionesh dhe biznesmen. Ai njihet edhe si përkthyes zyrtar në disa gjuhë të huaja, një profesion që e ka ndjekur paralelisht me rrugëtimin e tij profesional.

Shahinaj vjen nga një familje e njohur për traditën arsimdashëse e atdhetare. Është i biri i veteranit të arsimit Mustafa Zeqir Shahinaj dhe vëllai i shkrimtarit Hasan Shahinaj. Me studime në Inxhinieri Mekanike në Universitetin e Tiranës dhe Master në Universitetin e Shkupit, ai gëzon respekt në Elbasan, por edhe në trevën e Gollobordës, ku rrënjët e familjes mbeten të forta. Sot, ai dhe bashkëshortja e tij po i rikthejnë zonës diçka të çmuar: energjinë e zhvillimit.

Një dritë e vogël që paralajmëron ndryshimin

Në mbrëmje, kur dritat e vilës ndizen dhe bien mbi rrethinat e qeta të Fushë Studnës, duket sikur ajo shtëpi e re i thotë zonës se diçka po lëviz. Se turizmi mund të vijë, nëse dikush hap derën i pari. Dhe Shahinajt e kanë hapur. Nëse kjo vilë është vetëm hapi i parë, atëherë Shebeniku ka arsye të besojë se koha e tij po vjen.