Fatmir Terziu: Në lojën e kësaj dite të karrigeve muzikore ministrore

Në lojën e kësaj dite të karrigeve muzikore ministrore

Është një nga rrugët më të gjata në historinë e Shqipërisë. Nuk është fjala për ndonjë rrugë në kilometra, por për këtë rrugë, Rrugën e Edi Ramës në itinerarin politik. E në këtë rrugë, ai bashkë me qeveritarët që i piketon vetë duket se tashmë nuk janë më në autobuz, as dhe në karrocë demode, por në karusel. Dhe sytë sot, si në raste të tilla kur shfaqet karuseli janë tek Asamblea e PS. Sikurse shkruajnë mediat ajo sot mblidhet nën përkujdesjen e vazhdueshme të Ramës dhe në një ditë me shira. Si fitues i mandatit të katërt rrjesht, ai ka përgjegjësinë si dhe premtimin publik se në këtë mandat të ri qeverisës do ta fus Shqipërinë në BE. Kështu në shi, natyrshëm duket paksa më ftohtë, dhe në këtë të ftohtë vetë karuseli ministror gjithmonë i ka lënë të ftohtë ata jashtë aureolës së Asamblesë, kur tani edhe socialistët duken të zhgënjyer.

Kjo mbetet një përgjegjësi e madhe e kryeministrit, jo vetëm politike si mazhorancë, edhe kryesisht personale e tij, si Edi Rama. Opozita? Sipas gjasave duket se nuk ka asnjë shpresë se mund të ndryshojë. Prapë ajo PD, pa nerv, dhe forcë. Analistët e mediave shqiptare, më së shumtia ata që preferojnë të mburren se dinë diçka nga mëngët e Kryeministrit për asat që do të nxjerr në publik. Shprehen se kishin "parë" qartë diçka domethënëse në lojën e kësaj dite të karrigeve muzikore ministrore: “Në përgjithësi, riorganizimi [i kabinetit] përfaqëson një zhvendosje të qartë, nëse jo një anim djathtas.” Ata nuk mbeten të vetmit që mendojnë kështu. Disa emra të përfolur, por që asgjë nuk është e qartë, mes kësaj hamendësie fallxhore janë thjesht prej kohësh të ulur në një dorë të djathtë, por me dy gishta majtas. Një ndjenjë që e ndan qartë edhe opinionin e deklaruar të një televizioni se riorganizimi i anon qevitarët e rrinj të cilësohen si konservatorë djathtas. A është kjo një lojë?

Sigurisht që të paktën disa nga grupet e shtypit në fshatin mediatik arritën të ngjallnin sërish zemërim për shkak të riciklimit qeveritar me lojën tek emrat e rrinj për kandidatët ministra. Megjithatë, për pjesën tjetër prej nesh, i gjithë spektakli duket se është pak më shumë se një ushtrim i parëndësishëm i marrëdhënieve me publikun.

Jo se riemërimi i kabinetit është krejtësisht i parëndësishëm. Në plan të parë duket se do të shohim një qeveri pak më të largët nga sytë e publikut, por me gjasa më të afërt për sytë e Europës, se edhe takimi i fundit me Ambasadorët e Republikës së Shqipërisë nëpër Botë, ishte propagandimi dhe puna për anëtarësim e Shqipërisë në Europë. Kjo mund të paralajmërojë një ndryshim në deklaratat që lëshon qeveria. Mund të ketë edhe një taktikë të re me Kuvendin dhe po aq dhe me „respektin“ ndaj Opozitës. Gjithësesi me të gjitha sa shihet, vëmendja duhet të jetë tek përgjegjësia, dhe të mos shmanget vendimmarrja, sepse deficiti i llogarisë korrente u rrit për tremujorin e dytë të vitit. Sipas të dhënave nga Banka e Shqipërisë, ky deficit kishte vlerën e 263 milionë eurove, 19% më shumë krahasuar me të njëjtën periudhë të vitit të kaluar.

Por nëse diçka do të ndërtohet në të vërtetë nga kjo qeveri që nuk i kushton vëmendje përgjegjësisë dhe që i shmang vendimmarrjes, është një çështje tjetër. Për të tjerat Edi Rama qeveris i qetë dhe pa shqetësime. Ai ka bastin e jetës: futjen e Shqipërisë në Bashkimin Europian. Emrat e rrinj të Qeverisë? Futja kujt më shumë se xhepit dhe prestigjit të tyre u interesojnë aq shumë? A thua se ata që janë të papunë, ata në ndihmë sociale, ata që pa shpresa përditë e më shumë vetëm largohen, do të ndryshojnë ndonjë gjë në jetën e tyre, se u zgjodhën emra të rrinj ministrorë? Ajo që bëhet gjithnjë e më kurioze është „spektakli“ dhe „spektatori“ që hyn e del në lojën e kësaj dite të karrigeve muzikore ministrore.