PUTRAT GODITËSE TË VITEVE


QAZIM SHEHU GIJOTINA

U rrëqetha mbi gijotinë,

Në mëngjes drejtova shpinën

Dhe kokën mbi supe s`e gjeta…

Ajo plotësonte vitrinën

Me koka të prera…

Në haësirë të mendimit

Sëpatë e saj prêt,

Kokat që vërtiten

Me një mendim inert.

Hiq e prit koka si në gjendje lufte,

Edhe pse ato rrinë mbi supe…

RRATHË VETMIE

Vetmia rrathë rrathë

Na shtrëngon trupin…

Shtrydh ajo ngadalë

Helmet që s`na humbin.

Helmi del e ngjitet kërpudhë idilike,

Askush prej tij nuk vritet,

Kur gjen një mike…

AJO RE…

Shkon të fshijë ballin e diellit ajo re

Në një homazh lirik,

Si shami lektisje e vë re

Si një shall mitik…

Dhe tretet ajo ngadalë

Brenda kokës së tij,

Kaq djersë e valë

Brenda rrezes shkrin..

Ku shkoi ajo re

Qe apo nuk qe

Shtrydhur nga dorë e zemrës

Lagur nga mall i pafaj

Ja, kur vrejtet diell

Ndrit hije e saj…

TRËNDAFIL I HEDHUR

Një dorë kish hedhur një trëndafil

Në rrugë…

A ish një përbetim kurorëshkelësi

Në avull dështimi shuar

A një përbetim sahanlëpirësi

Që lule mban në duar..

Çfarë mund të ishte ende ai trëndafil

Këputur me nxitim,

Për të shkuar atje ku zënë fill

Përbetimet me trishtim?

Mos një pendim,

Se dikush lulen nuk e meriton as në varrim…

+++

Gjeta një trëndafil dhe thellova

Pandehmat e kota,

Me to lulet urova:

Të lulëzojnë për plagët tona…

SUPET

Zgërdhihet e korruptuar lavdia,

Në tradhti supesh të mpira.

E sup e sup dhe hapi, tapa tup,

Hap e hap dhe supi nuk ngjitet më lart;

Kështu të dështuar mbajmë

Sa pesha që nga supet s`i ndajmë.

S`dihet kur do t`u shpëtojmë çlirimit të supeve

Skupeve,trukeve dhe nxitimit

Të disave që supet tonë rëndojnë,

Dhe për pak kohë të gënjyerit qetësojnë…

PUTRAT GODITËSE TË VITEVE

Mbulesë e gabimeve të mia

Zbuluese e tyre me takt e pa takt…,

Gjëmon gjaku i dashurive

Në damarin për parainfarkt.

Putrat goditëse të viteve

Sjellin shpesh tek ne kafshën

Sa më tepër dashurisë i avitemi

Se bëkemi më njeriun,po fantazmën…

22 views1 comment

Shkrimet e fundit