Plazma në “Sheshin Gensher”


F. Terziu: Elbasan 2019

Tregu i romëve “Parku Rinia”

Nga Fatmir Terziu

Gjuhët janë vigjilente,

jo sa sytë,

qofshin me syze optike, dielli, apo dhe lente

një dhomë e ndezur nga hëna gjysëm e plotë,

e butë coha që prek

ballin e mbushur me djersë

poshtë një zog,

mbi të dhe nën të një botë,

toka dhe qielli janë mbledhur në një gotë,

verë e shtrydhur,

rrahjet e zemrës metojnë me kujdes.

Dy trupa shastisin tregun e zhurmshëm

një kanape,

një mëndafsh i mbushur me flokë bore,

e pasmja takon diku në një mbrothësi,

e përparmja më kot mbulohet nga krahët,

ndërsa romi me mustaqe lëpin një përzierje krudo,

romja fshin bulëzat e djersës dhe jep xhevap:

e shesim edhe këtë nudo.

Elbasan, gusht 2019

Tek berberana e Zaranikës

Nga Fatmir Terziu

Koka është si toka kur zhvishet nga geni

në një berberanë

flokët janë vetë rendi

imagjinatë, perceptim

apo një modifikim i leshrave trendi…

… kjo i përket edhe kokës së zhveshur:

me lesh të ashpër e të bardhë

e vetmja rrugë e mbetur e pashkelur

mendja duke kullotur mbi xham,

kohë e kohërave më parë,

shkel një hapësirë të mbjellur me zjarr

me dy anë të ndara nga një urë

të mbytura me thashëtheme e fjalë

dhe dy krahë të një lumi

që mbledh poshtë

në një rrjedhje të ndjeshme

kujtimet e lodhura të viteve

ku koha ecën e ndalon sipas ritmeve

tek përskuqja e faqeve pa një buzëqeshje.

Bota ende shtrydh thashëthemet

e përroit që nga fryrjet u bë lum i prushtë,

mbrëmjeve pret që të dehet

diku poshtë Ullishtes në një nyje të ngushtë.

Leshrat bien lotë duke lënë thinjat mbi xham,

aty, në Zaranikë, në një berberhanë.

Elbasan, gusht 2019.

Plazma në “Sheshin Gensher”

Nga Fatmir Terziu

Në Sheshin “Gensher” plazma dirigjohet nga pasthirmat,

në zagushinë e Bezistanit të moçëm,

kumuritë zbaviten

në një shtrojë shumëngjyrëshe me qindra arna gjethesh,

hija ende si shkopi i Sulltanit zhvishet,

e dehur nga kënaja mes gishtave.

Plazma rrëshqet mes metaforave të një reklame

harpa i ka mbyllur sytë nga frika

një shtrëngatë e madhe mund ta zgjoj atë në agim

në kitarë me Alfons Balliçin mjeshtër,

por ajo enkas ka nisur të lëshojë melodinë e saj

diku në kërkim

të mozaikut të vjetër.

Plazma shëtit gjeografinë e radhës

po e vidhos në mëndafshin e natës.

Elbasan, gusht 2019.

31 views

Shkrimet e fundit