Pantomimë
Nga Aida Taçe Shpata
Në sheshin e lagjes sime është një i panjohur , pranë tij vjen për shoqëri një tjetër burrë i panjohur . Kalojnë disa orë të mira duke e shikuar njëri-tjetrin në sy dhe nuk përshëndeten . I pari mendon se mund të ishte e mundur ta salutonte , por nuk e bëri . Burri i dytë priti disa orë që mos t'i flisnin dhe asnjëherë nuk e çoi nëpër mend të fliste vetë i pari . Të dy po shtyjnë orë të tëra qetësie në pritje , secili kërkon mos ta dëgjojë tjetrin . Nuk bëjnë asnjë zë , bëjnë ca shenja drejtuar hapësirës , ulen në gjunjë , fishkëllejnë me mend , kryqëzojnë duart dhe heshtin . Nga një dritare te një apartament aty afër dy sy ndjekin lëvizjet e dy të panjohurve në shesh . Nga lart sytë ndjekin dhe hijet e dy burrave të panjohur. Te lulishtja aty pranë është bërë një gardh i dendur ligustrash , hijet janē zgjatime që ndonjëherë e kalojnë gardhin . Dy sy të tjerë shikojnë dy silueta bardhë e zi . Ështē një qen që ndjek lëvizjet e burrave në shesh nëpërmjet hapësirave që lejojnë gjethet e ligustrave . Një zog fluturon në ajër dhe nuk i ndihen lëvizjet e krahëve . Edhe ai shikon që në shesh janë dy gjallesa të heshtura që janë përqendruar në drejtim të kopshtit . Në stolin e bardhë në mes tē lulishtes është ulur një zonjushë e re . Fustani i gjatë nuk ia ka mbuluar kyçin e këmbës , shumë sy janë përqëndruar mbi nyje . Burrat , sytë që ndiqnin nga apartamenti , qeni nga ligustrat e zogu nga ajri lëshojnë impulse dëshirash të paemancipuara . Natyra ka mprehur shqisën e saj të madhe . Edhe ajo shikon që vajza padashje ka krijuar një gjendje patologjike dhe haluçinative . Në hipnozën e krijuar edhe qeni me zogun janë shndërruar në trajta estetike . Psikologjia e personazheve zbulon kuriozitetin e fshehtë mashkullor , femra te kopshti afër pa dashje e pa kujdes ka zbuluar këmbën . Njohja mbi botën zbulon kushtet absurde të ekzistencës humane vetëm me shqisa , pa fjalë .
