Për verim

Nga Petrit Malushi

Festë

„Parlamentarët nisën pushimet...“,

Kryelajmi i ditës, sot.

Gëzim në familje, filluan festimet,

„Grua mbushe,ta kthej një gotë !“

Nuk do zhurmojë televizori,

Të qetë sy e veshë do të jenë,

S´do t´na bezdisë, i pistë fjalori,

Grushta e shqelma s´do vijnë e venë.

Gënjeshtra nuk do jepen falas,

„Për ju o popull, natën bëjmë ditë...

Veten po tretim... ua themi ballas...

Në pushtet... dhe në opozitë...“

Tensioni i lartë, dhimbjet e kokës,

Të vjellat kanë për t´na ndaluar.

Me këmbë s´do t´i biem tokës

„Medet, për kë paskemi votuar !“

Për verim

Ngjitej pushtetari për të veruar

Në majë të malit ky fryn veriu.

Tej monopatit hije mbuluar

Ballas e ndeshën bagëtitë dhe bariu.

Pa u përhapën dhëntë dhe dhitë

Ndër bokërrima duke blegërirë.

“Bo,bo ky “ujk” s’gopet ! Përditë

Do mish në hell e mëlçi të grirë“.

“Duar të gurta”

Dikur, dikë e ngrita nga balta

Dhe i pastrova një okë lluc.

Rastisi, për ndihmë,vite më mbrapa,

Dorën ia zgjata të kaloja një rrugicë.

Dru e shtrembër u bënë në çast

Duart e tij, u kërrusën mënjanë.

“Të gurta” m’u dukën, pa gjak, pa asht...

Gjymtyrët forcova, dola matanë.