top of page

NUMËROJ PETALET E TRENDAFILIT


NUMËROJ PETALET E TRENDAFILIT


Se si më erdhi këtë mbremje duke parë hënën

Të numëroj fletët e trendafilit

Një petal i kuq

Një jehonë tik-taku në zemër

Dy petale të kuqe

Niste notën e dytë të valsit të dashurisë.


Se si më erdhi këtë mbremje duke parë hënën

Të numëroj petalet e trendafilit

Një petale e kuqe

Një dallgë ngrinte në det

Dy petale të kuqe

Niste pushtimin e bregut të lumturisë.


Se si më erdhi këtë mbremje duke parë hënën

Të numëroj petalet e trendafilit

Dhjetë petale të kuqe

Si zogj çuçurisin mbi kaçurrela

Njeqind petale të kuqe

Një yllësi e terë varur te gusha jote


Se si më erdhi këtë mbremje duke parë hënën

Të numëroj fletët e trendafilit

Si grup lab iso të mbajnë..

Do marr kazmë e lopatë

Do shkoj t’i zbuloj varr

Të shikoj ç’nur i ka renë

Nuri kuq apo nur i bardhë?


Se si më erdhi këtë mbremje duke parë hënën

Të numëroj petalet e trendafilit

Si luledele t’i shkul

Të gjej burimin e ngjyrës flakë.

Gjeta shpirtin tend

Që shperthente e buiste në ekstazë


PRAPË E PYES BISTRICËN


Sa herë e kam pyetur e po e pyes Bistricën time

Eleganten, me fustan jeshil, rrugës kur e ndesh

Na çmende me atë sy larush,kush moj ta ka fal?

Kthen paksa kokën plot naze e vetem buzëqesh.


Prapë ngul këmbë, e ndaloj rrugës dhe e pyes

Me qerpikët ujëvara argjendi që i varen në vesh

Na çmende moj , me atë gushen e bardhë kristal

Ajo prapë nuk përgjigjet,por vetem po buzëqesh.


Prapë e prapë e pyes të bukurën Bistricën time

Më lindi dielli me dritë-më tha- në krahët e erës

Më atë bukuri e çmenda atë të poshtrën kuçedër

I qendisa sytë e mikës tende,motrës së pranverës




VONON TË DALË HËNA NË FSHAT


Hëna prapë vonoi të dalë edhe sonte

E qyqja ia nisi këngës pak me herët

Heshtja me qelloi fort me shuplakë

E më hedh batanien e murmë,të errët


Xha Nasi, gjitoni im, kollitet në oborr

Përkedhel qenin e plakur dhe bisedojnë

Zvarritje hapash e dera me qarje kercet

Një oh,rënkimi,pastaj ca hije vallëzojnë


Angullimat e qenve thyejnë terrin vrastar

Dhe xha Vasoja ngre televizorin pa kufi

Mos trembin zogjtë e trishtimit mbi pemë

Mos e natën e pafundme e shkurtojnë disi






KUR TË VISH TI


Gjyshi im i urtë theri dashin më të mirë

Kur po ndertonim shtepinë e re në fshat

Gjakun mblodhi e në themele e murosi

Të kercente hëna në kalanë time Rozafat.


Në dritarët e saj mbollëm borzilok me erë

Aromë dashurie të mbante e gjithë çatia

Gurë stralli tek muret, të thyej kokën era

Dritë agu për bojë,të ndritin nga bardhësia.


Pastaj i bëmë ftesë mbretit të qiellit,diellit

Ta kemi mysafir të parë të shtëpisë sonë

Ftuam edhe dallendyshet te balli i portës

Të vinë të na thonë kur vjen pranvera jonë


Në oborr mbollëm rrush të na ëmbëlsojë

Lule të bardha dhe trendafila të kuqe plot

Kur të vish ti e dashur tek pragu si nuse

Oriz do të hedhin e s’do të përmbahen dot

15 views0 comments

Shkrimet e fundit

fjalaelireloadinggif.gif
bottom of page