top of page

NË KOLOSE


NË KOLOSE


Poezi nga Kozma Gjergji



NA DUHET


Edhe në shekullin njëzet e një

Na duhet ende të luftojmë

Me ata që

Helmuan Sokratin,

Me ata që

Kryqëzuan Jezu Krishtin,

Me ata që

Sollën ferrin e vërtetë në tokë…


Janë po ata

Shpirtra të zinj

(Vetëm emrat, fytyrat

dhe armët kanë ndryshe.)

Me etjen satanike

Për mizori,

Pushtime e sundim.


Janë

Rreziku më i rrezikshëm,

Prandaj na duhet

Domosdoshmërisht

T'i mundim.



NJË ÇAKALL


Tek pa në mengjez

Hijen e tij të stërmadhe

Mendoj gjithë kënaqsi

Të gjuante sa më tepër

Buaj, zebra, drerë, arinj…


Dhe shpejt ia dha vrapit

E trimërisht nisi gjuetinë,

Mirëpo në çdo përballje

Mori veç goditje brirësh,

Shkelma, kafshime…


I raskapitur në mesditë

Ndërsa shikonte

Hijen e tij të stërzvogëluar tha:

Kot lodhem unë

Kur më mjafton dhe një kërmill.



NË KOLOSE


Tronditesh

Kur mëson që këtu

Argëtimi më i preferuar

I kastës së lartë

Ka qenë

Ndeshja gjer në vdekje

E skllevërve

Me tigra e luanë!



NJË BUKURI


Megjithëse e lakmonim tmerrësisht

Asnjëri prej nesh s'ia shprehu dashurinë.

Mendonim që e atillë bukuri

Meritonte veç të famshëm a pasanik.


Kështu vlerësonin dhe plotë të tjerë

Gjersa një ditë ajo befas

Fare pa bujë u kurorëzua

Me një të thjeshtë si dordolec.


Pyetjeve e habitjeve të të gjithve

Ju përgjigj me krenari mbretëreshe:

E pëlqeva për guximin prej heroi

Dhe që ta kem krejt për vete.



PERLAT


Perlat e vesës anembanë

Janë lotët e shenjtë

Të vetë Shën Marisë

Veshur me

Rrobat e zeza të natës

Për gjithë

Fëmijët dhe të pafajshmit

E vrarë në Ukrainë.



FARAONËT


E ngritën Egjiptin

Nga rëra dhe i dhanë

Famën e mumjeve.

Varrosën breza e popuj

Për të ndërtuar

Për vete

Varret më madhështor.



Ç'EPSHE…


Ç'epshe i pollën këta lugetër

Që dhe gjarprinjtë e pafajshëm

I kokolepsën keqas me shoqi-shoqnë!?



ZJARRFIKËSI


Kush i vuri zjarrin pyllit?!

Habitërisht

Kërkimi zbuloi

Dora vetë zjarrfikësin!



SHQETËSIMI


Një bashkëshort ideal

I shqetësuar në kulm

Pyeti doktorin përse

Gruaja i qante shpesh

Krejt pa shkak?!


Mjeku e qetësoi:

Asnjë shqetësim, miku im,

Çdo grua e ka

Qoftë dhe në ëndërr

Një të dashur

Për të qarë.



GRABITQARËT


Me sa gëzim i rrahin flatrat

Shpesët grabitqare

Kur i nxjerrin sytë kufomës!



NJË PJATË


Një pjatë e thjeshtë

E servirur me dashuri

Shijon tejet më tepër

Se një pjatë e pasur

E servirur me urrejtje.



KËNGA


Kënga e detit

S'mbaron në breg,

Por tek zemërat

E atyre që e

Dëgjojnë.



PESHA


Pesha e dashurisë

Që më rëndon në gji

Bëhet më e lehtë

Kur e.mbajmë të dy.



NA GËNJYEN


Na gënjyen pasqyrat

E ditëve

Të turbullta e mjegullore

Duke i treguar

Disa njerëz

Super të mëdhenj.


Kozma Gjergji.

48 views2 comments

2 則留言


Kozma Gjergji eshte nje poet me qiber te holle, hulumtues dhe kerkues i se vecantes, intimes dhe gjetjeve te thjeshta brilante, qe sic e kam theksuar dhe here te tjera, te ngelen ne mendje.

Poet larg kozmogonizmit, te shtirurit per t'u dukur i "MADH", Me koklavitje e nderlikime absurde

hipokrite, te shtirura, te pakuptueshme.

Keto i deshmon me se miri edhe ky cikel i bukur poetik, transparent, me dhimbje dramatike jetesore per probleme te medha te njerezimit.

Me pelqeu i gjithe cikli poetik, por ne vecantesi poezite: " NA DUHET", " NE KOLOSE", " NJE CAKALL", " PERLAT" ,( Nje mrekulli artistike qe flet me shume se nje poeme), Zjarrfikesit. Grabitqaret, etj, etj.

URIME me arritje te tjera. Te perqafoj,…


按讚
Kozma Gjergji
Kozma Gjergji
2022年9月02日
回覆

Miku im, Myslim, të falenderoj shumë për angazhimin dhe mendimet tejet të çmuara, të cilat më dhanë gëzim të veçant, se mbi të gjitha më vijnë nga një mjeshtër i vërtetë i punimit të këtij lloji "ari". (Ndjesë për vonesën se kam patur një problem në tableti)

Të përqafoj me mirënjohje, K.Gjergji.

按讚

Shkrimet e fundit

fjalaelireloadinggif.gif
bottom of page