DY DESHIRAT E MIA
Do të doja të isha në Elbasan me Gaz Kishtën,
T'i dhuroja shokut të tij të përzemërt
Librin më të fundit që kam shkruar
Me alfabetin e rrezeve të diellit në mëngjes...
Kam dhe një tjetër dëshirë,
Që vargjet e mi të ishin bomba
T'i hedhin në erë tanket ruse
Që po masakatrojnë me zinxhirë
Pranverën pafajshmee të fëmijëve të Ukrainës...
LUMTURIA
Lumturinë e shoh te prania e saj,
Kur më buzëqesh me sy të pafaj.
NGA PERVOJA
1.***
Me fatin e një tjetri mos u ha,
Të lehtë a më të lehtë sa s'ka.
2.***
Këpucët e reja shkojnë me rrobat e vjetra,
Po rrobat e reja nuk shkojnë me këpucët e vjetra...
LOJCAKJA
Moj lojcake,çapngadaltë,
Bukureza më t'u faltë,
Era lule,era mjaltë...
Qenke rritur lojcja ime,
Mes aromash trëndeline,
Larg prej hijesh arrahine...
Nga lëndina në lëndinë,
Syri-syrin vetëtin,
Heshtja-heshtjen psherëtin...
Mbi gjinj flokët palë-palë
Hape zemrën,fol një fjalë,
Botës tymi le t'i dalë...
* * *
Buzëgënjeshtare!...
Më paske puthur
Pa më dashur fare...
Në djall puthjet
Që më dhe...
Kthema gjumin që ta fle!...
* * *
Pse m'i fshihesh syrit,syrit që s'të fshihet?
Pse s'e shuan etjen,uji kur të pihet?...
A e di se bora po i çmend përrenjtë?...
A e di se prilli i gazmend lumenjtë?...
A ia ndjen bilbilit netve gushëritjet?...
A ia ndjen çapkënit zemër-përpëlitjet?...
Mos i ik më hijes,hijes ku të rrihet,
Mos iu fshih më syrit,syrit që s'të fshihet...
Jo mëkot s'të hahet...Jo mëkot s'të pihet...
FLOÇKA E KAÇIVELIT
Kaçiveli - gërxhe e mareshta,
Ku s'dëgjohen këngë kumurie,
Porsi zonjë e vendit çel gjineshtra,
Shtatin zverdh me lule xhelozie...
Uturon Devolli i shkumuar,
Ku kam lënë kujtime në të ri,
Ku më je,moj mike?...Përmalluar
Rri e shoh te diga me dylbi...
Përrenjtë grahin ujrat me potere,
Që lart-poshtë,mes brigjesh me hutinë,
Ftoh lëkurën,thekur si kothere,
Ku ermon verdhoshja trëndelinë...
Ngjatjetoj të njohur,të panjohur,
Që të gjithë më shohin me çudi,
Nuk e dinë që malli s'm'u ka ftohur,,
Nuk e dinë se ç'duan sytë e mi...
Mespërmes liqenit unë i rashë
Me një varkë shprese asaj dite,
As si floçkë * në ujra nuk e pashë,
Puthje-ëmblën vashëz devollite...
*Zana mitologjike e ujit
