ADRIANA MYRTAJ
Dita është Sot...
Shkohet për te idea se Vetëdije është tërësia e parimeve njerëzore, etike dhe morale në të cilat sillemi në çdo ditë tonën, siç e diktojnë principet brenda nesh.
Të kesh vetëdijen në punë, në kapacitetin më të lartë, bëhet detyrë jete. Të përdorësh vetëdijen gjatë jetës është si për herë të parë i zgjuar nga një jetë gjumi.
Të urtët, prandaj e quajnë proces: Zgjim i vetëdijes.
Rilindasit erdhën njëherësh, si plejadë, u quajtën të rilindur, dhe epoka e tyre u quajt Rilindje!
Rilindja askujt nuk i është premtuar t’i zbresë e gatshme prej ca qiejsh të ndritur…
Imazhet nga bota këtu poshtë janë të fuqishme, na tërheqin individualisht dhe të gjithëve së bashku, herë në një kah e herë në tjetrin.
Bota me vetëdije, ku gjërat janë në dritën e së vërtetës, shfaqet e zhduket që të rishfaqet përsëri, si në përrallën e fëmijërisë, ku e Bukura e Dheut...!
(nga "Refleksione", vetpublikim, Toronto)
