![](https://static.wixstatic.com/media/a48dbc_23b25949b16c4d4f9366262ecc40da34~mv2.png/v1/fill/w_49,h_49,al_c,q_85,usm_0.66_1.00_0.01,blur_2,enc_auto/a48dbc_23b25949b16c4d4f9366262ecc40da34~mv2.png)
Diskurset e Gjergj Fishtës në Një
Nga Fatmir Terziu
Lavdi atij prej dhjetëra emrave të Kongresit të Manastirit
për dhuratën e së mrekullueshmes dhe tej të zakonshmes
që për hartimin e alfabetit shqip iu lut qiellit
dhe ua huazoi zogjve
lirinë e bekuar të shkrimit.
Ai që bëri që dielli të na ngrohë në vatrën tonë, qielli të shtrydh shi
në rrjedhë tek Kisha e Gjuhadolit
e eshtrat të mbidhen me shkëndijë
mes Drinit, Gjolit
atje lart në Veri,
që ti shpërndajnë mesazhin ngado Globit
errësira po zbret në Shqipëri.
Ai që bëri që Hylli i Dritës të shkëlqej edhe në Shkodër,
hëna të zverdhet
se mishi i robit ikën,
e kocka e tij mbetet.
Ai që drejtoi erërat, refrenin e zogjve
në vargun e pastër të lirisë
për t'u dhënë fuqinë e pavdekshme të gjithë robve
të këndojnë shekujve Lahutën e Malcisë.
Ai që me eshtrat e tij thyen në dallgë grilat e deteve.
Ai që urdhëron lëngun e hardhisë dhe të grurit.
Ai që iu dashurua shqiptarit në krahët e shqiponjës.
Ai që i dha vargut një sy të zgjuar.
Ai që ende i thërret Botës:
Jam i lirë, jam në ujërat tuaja … mos më keni harruar?!