Sekretarja e Jashtme britanike Liz Truss u takua të hënën në Londër me gjashtë ministrat e jashtëm të Ballkanit për të diskutuar forcimin e lidhjeve ekonomike dhe të sigurisë dhe mbështetjen e lirisë dhe stabilitetit në rajon. Zonja Truss zhvilloi bisedime me homologë nga Shqipëria, Bosnja dhe Hercegovina, Kosova, Mali i Zi, Maqedonia e Veriut dhe Serbia. Mbretëria e Bashkuar është e prirur të bindë aleatët ndërkombëtarë që të "mbrojtnë paqen e fituar me vështirësi" në një rajon ku tensioni është rritur gjithnjë e më shumë.
Diskutimet vijnë pasi përfaqësuesi kryesor ndërkombëtar në Bosnje dhe Hercegovinë, diplomati gjerman Christian Schmidt, paralajmëroi se marrëveshja e paqes e vitit 1995 që ndaloi luftën civile të vendit mund të shpërbëhej.
Kërcënimet e separatistëve serbë të Bosnjës kanë nxitur tensionin në rajon dhe ka pasur shqetësime për përfshirjen ruse. Schmidt ka thënë se kombi ballkanik mund të shpërbëhet nëse komuniteti ndërkombëtar nuk frenon veprimet e kërcënuara përçarëse nga udhëheqësi serb boshnjak dhe anëtari i presidencës Milorad Dodik, i cili ka mbështetje të heshtur nga Rusia dhe Serbia. Mbretëria e Bashkuar mendon se tani është një moment kritik për Ballkanin Perëndimor dhe se është e rëndësishme që të ruhet paqja, liria dhe demokracia që u fituan me vështirësi më shumë se 20 vjet më parë.
“Së fundmi prita takimin e ministrave të jashtëm të G7 në Liverpool, ku u mbajt një diskutim për Ballkanin Perëndimor dhe ministrat mirëpritën rritjen e pranisë së Mbretërisë së Bashkuar”, tha zonja Truss.
“Dua që Mbretëria e Bashkuar dhe aleatët tanë të ndërtojnë lidhje më të ngushta ekonomike dhe të sigurisë me rajonin, gjë që do të nxisë vendet e punës dhe rritjen dhe do të ndihmojë në mbështetjen e një Ballkani Perëndimor më të lirë, më të pasur dhe më të sigurt.
“Unë mirëprita gjithashtu përfaqësuesit nga BE dhe SHBA në këto diskutime dhe theksova nevojën për të punuar së bashku për të rritur përpjekjet tona për të gjetur zgjidhje të qëndrueshme për të ulur tensionet në rajon.
“Si pjesë e kësaj përpjekjeje, Britania e Madhe ka emëruar Sir Stuart Peach si të dërguar special për Ballkanin Perëndimor.
“Ai ka përvojë të gjatë në rajon, si ish-shef i shtabit të mbrojtjes të Mbretërisë së Bashkuar dhe kryetar i komitetit ushtarak të NATO-s dhe do të vizitojë rajonin nesër për të çuar përpara angazhimin tonë.
“Kjo është pjesë e misionit të FCDO për të krijuar një rrjet global lirie të bazuar në lidhje më të thella ekonomike, teknologjike, sigurie dhe zhvillimi. "Si demokraci liridashëse, MB do të ndihmojë Ballkanin Perëndimor të mbrojë dhe avancojë kauzën e lirisë. Ata kanë mbështetjen tonë të plotë jo vetëm për të mbijetuar, por edhe për të lulëzuar."
