Biblioteka e Libohovës

Nga Fatmir Terziu

Ëndrra të pashkruara

përralla të dashurisë së ndaluar

lemza të tharra

nën çarje mjegullash të serta.

Shfleton vjeshtat e zverdhura

korridoreve të injorancës

ditët, si eshtrat e të vdekurve,

vishen me të kuqin e përrallës

që veshi me zjarr muret e shekujve.

Ato u bënë hi nën një dru bliri,

pas shpinës së partizanit katërmbëdhjetëvjeçar

një cigare kalohet nga dora në dorë

ku po i shpinte kjo masakër vallë?

Sikurse tymi dhe mallkimet

lëkunden ende në ajrin e kohës,

e kishin zili lirinë e një zogu dykrenor,

që kishte ngritur folenë Bibliotekës së Libohovës.