BALADË PËR KOMPOZITORIN E TANGOS SHQIPTARE. MUHARREM XHEDIKU
Muharrem Xhedik, Muharrem Xhedik
Bir kreshnikësh dhe vetë kreshnik
Në djepin e luftës u linde dhe u përkunde
Frymëzim të dha ninulla e nënë Sudes
Çiftelia e varur në murin e kullës
Instrumenti i parë që syri të shikoi
Melodia e fyejve të barinjve të Korabit
Muzika e parë që ty të frymëzoi.
Cuca e bukur, flokëkaçurrelja e Radomirës
Ishte burim i të bukurës dhe i të mirës
Turtullesha, ky zog i dashurisë
Ta ngriti zemrën peshë si turtullesha
Ty, o muzikanti i pavdekshëm i shqiptarisë.
Në Kosovë, Dibër e Labëri
Në Shkodrën e jareve, në Korçën e serenatave
Në Tiranën e mbrëmjeve të vallzimit
kërceheshin direkt tangot e mesnatave.
Eh, Muharrem Xhedik sa shumë në borxh na ke futur
Për ty, për pesëdhjetë vjet askush nuk u kujtua
Harruan se këndonin dhe kërcenin mbi pentagramin tënd
Harruan se jetonin me dashurinë e këngëve të tua.
Hej Xhedik, për ty nuk mjafton kjo poezi
Kthema oshëtimën nga andej ku je ti
Ti je një ëngjëll, e pavdekshmja melodi
Ti je pavdekshmëria, ti je një mrekulli.
