KURAJO NGA OSHO*
por ti qaj dhe ke për të qarë
dashuro dhe ke për t’dashuruar
paj, dhemb dhe do t’ndiesh dhembje
ëndërro dhe ke për t’ëndërruar
çmallu dhe ke për t’u çmallur
ndriço dhe ke për të ndriçuar
ah, ti qaj dhe ke për të qarë
dashuro dhe ke për t’dashuruar...
______
*Mësues shpirtëror (guru’) i famshëm indian i shek. XX.
BEAT GENERATION
ah, të kisha një zemër në vend të zemrës
të kisha në vend të zjarrit një zjarr
sikur një dhembje në vend të dhembjes
buzë të kisha në vend të buzëve
një ëndërr sikur në vend të ëndrrës
në vend të botës të kisha një botë
sikur në vend të fjalës një fjalë
por të kisha në vend të zemrës një zemër
në vend të zjarrit të kisha një zjarr...
EKZALTIM
kur do rrimë për duart
për atdheun, kurmin kur
për mallin, për yjet
kur do rrimë për buzët
për lotin kur do t’dashurojm’
ah, për zjarrin, gazelën
për shpirtin kur, për humnerën
kur do rrimë për sytë
do dashurojm’ për orkidenë
për Zotin e detin kur
për njerinë, për vdekjen
por kur do rrimë për fjalën
do dashurojmë për ëndrrën
për terrin, për agun
mbrëmjen, seksin, poemën
do sekush dritën e vet
kur do rrimë për duart
kur do dashurojmë për retë
për atdheun e zjarrin
dhembjen, detin, kometën...
AUTOGRAF
unë ky jam-frym’ fushe Syneji
mbrëmjesh me avuj të heshtur vjeshte
arë me tërshërë e trumzë
buzë greminash në Peqinaj
mall veror mollësh n’Bardhor
ky që jam-ermim mersine n’Kazie
vrull merluci, kripë vale
me shkulm t’vrullshëm n’Farsiluk
ah, në Karpën,- se ky jam
prekja e barit, e gurit posht’ këmbëve
paj, e rërës së ngrohtë
e s’bëhem tjetër,-vresht’ që pikon,
shqop’ e oksimoron në Domën
hapa t’ëmbël n’Kepin e Lagjit me hënë
rim’, e orakull,- ky që jam në Rrakull
frym’ fushe Syneji* me avuj vjeshte...
______
*Toponime fshatrash e vendesh të trevës së Kavajës.
ARIE
flaka plagoset veç nga një tjetër flakë
si plagoset koha nga një tjetër kohë
si drita veç nga një tjetër dritë, si loti
veç nga një tjetër lot, ah, si fjala
plagoset veç nga një tjetër fjalë, ëndrra
nga një tjetër ëndërr, si puthja nga një tjetër
puthje, malli nga një tjetër mall
si koha veç nga një tjetër kohë, si flaka
plagoset veç nga një tjetër flakë..
Durim Çaça
Nga libri poetik “Sharme shamani”, Ombra GVG, Tiranë, 2012.