KULLA E FISIT
Një gjysëm kullë,
Trashëgimi e lashtë,
Shoshë m'i bëri ëndërrat e fëmijërisë,
Kur para syve m'u çfaq;
Tek shlodheshim nga rrugë e gjatë,
Mbi një gurë latuar
Nën hijen e vrarë.
U ndalëm me babanë
Trandur nga magjija e fshehtë;
Treta buzëqeshjen murëve rrënuar nga koha,
Faqeve të babait
Loti zu të bjerë.
Muret e lashtë me lotët gurë
Si të përgjumur,
Përshëndetën dashurinë time
Të lumtur.
Ostren i Madh 1974
SHTËPIA E VJETËR
E shembëm shtëpinë e vjetër,
Veç një murranë mbet atje;
Një tufë pëllumbash trulltarë
Me shkarpa e pupla ngritën fole.
1965
MËSIM NË GODULL
Fiks në orën njëzet,
Kur një drapër hëne
Buzë Godullës krekzat i pret,
E në suprinën e ujit qielli ndrit argjend,
Gurgull,gurgull ngjalat e buta
Migrojn në kënetë.
Fiks në orën njëzet e një,
Kur hëna fshihet nën kurorë,
Në ikje,
Rrebelohet llapashitja e ngjalave të egra
Mes një rregulli,
Marrëveshjesh mistike.
Rrezervati Rrushkull 1975