1. AROMAT E JETES
Kur hyj mes mollëve,
Erëmohem nga mollët,
Bie era mollë...
Kur hyj mes varreve,
Erëmohem nga qirinjtë,
Bie era qiri...
Aromë molle ka jeta,
Vdekja -
Aromë qiriu...
Midis dy aromave - njeriu!
2. U POQ GRURI I JETES SIME
Jetës sime hamullore
Me mjaft vite të ronitur;
Iu thanë ëndrrat qumështore,
Vit pas viti duke pritur...
Etja ishte e përditshme
Në gjithë fjalët e pathëna;
Te refrenet e mërzitshme,
Te këpucët thembërngrëna...
U poq gruri i jetës sime,
Nëpër rrudha,nëpër thinja,
Si kafshata,si thërrime
Vargje hëngra e s'u nginja...
3. TRENDAFILAT
Nga cilët shpirtra u sajuat,
Nga ç'puthje çiftesh dashurisht?...
Gonxhe-puthjet i sythuat,
I ermuat gonxhërisht...
4.E TASHMJA
Çdo çast e tashmja vjen e zhduket,
Me çastin tret në kohë të shkuar;
E çast pas çasti prapë,sa duket,
Si rërë firohet nëpër duar...
I mblidhka çastet mosha e thinjur,
I tkurr te rrudhat e ballit tonë;
Askush së tashmes s'i është nginjur,
Sa vjen,na tretet përgjithmonë...
Me të u mbushëm e u zbrazëm,
Me stinë,me vite,zheg e vapë;
Tek qajmë në vdekje,kcejmë në dasëm,
Shami beqarësh digjen prapë...
5. PSALM
Jam ai që s'kam qenë,
Ndryshe shqetësohesha atëhere e ndryshe - tani;
Kur është dashur guxim e s'e shkrova me penë,
S'e quaj trimëri...
Dhe gjërat për të cilat shkrova,kanë ndryshuar,
S'ka lajme me taraca,me shina e traversa;
Një pluhur i trashë harrese i ka mbuluar,
Ani se këmishat na griseshin nga djersa...
Kur guxim kam ndier e s'e shkrova me penë,
S'e quaj trimëri;
Vërtet,s'qenkam më ai që kam qenë,
Ndryshe e njihja veten atëhere e ndryshe - tani...
Po si do të ndjehem nesër?...
(Përgjigjen ua them të nesërmen,jo tani...)
6. ***
Prej njeriut zemërgurtë,
Mos e prit një fjalë të urtë.
7. ***
Lindur s'jam për privilegje,
S'kanditoj për deputet;
Jam si shtamba me dy vegje,
Kush më mbush,më pi me et...
8. ***
Jo çdo gjë mund ta peshosh,
A peshohet mendja bosh?...
