... të kuptosh shkelësit e padukshëm


... të kuptosh shkelësit e padukshëm

(Jeta është si një tabaka)

Fatmir Terziu

Ne vërtet jemi si loja e filxhanëve,

fshehim unazën… dhe…

kur s’e gjejmë gjerbim kafenë e llafeve

duke bërë poza fatesh me rrebeshe enigmatike

për hir të kufirit të padukshëm…

…kanë filluar të më pëlqejnë rrebeshet e motit

njësoj si fytyrat bardhë e zi të reve,

në ikjen e tyre honorifike,

tretjen për të shpëtuar etjen e madhe,

pasi të tjerat janë bërë më të vërteta se karnavalet

maskat kanë sytë e kohës

por shikimin e ngutshëm të djeshëm,

duhet t’ua mbash mend fytyrën me nishanet,

rrudhat,

shenjat dhe … lajthitjet e nervave,

të kuptosh shkelësit e padukshëm të kufinjve të urrejtjes,

xhelozisë,

cmirës,

të shtirën e një dite me Diell…

më thoje, … nuk dihet çfarë trukesh thurr mendja, në këtë tabaka,

e kujtoj, e kujtoj … më së shumti tashmë i shtrenjti Baba!

33 views

Shkrimet e fundit