Sinagoga e Sarandës


Ish S.M.T. e Sarandës

Fatmir Terziu


Eci mes kaçavidave dhe mbetjeve pa trup

pa trup e shoh diellin nën një trung

në hije

prekja tikluese e hijes së gjallë,

e urtisë së kufirit tek thana,

përmes hapësirës ngushtuese të memorjes,

del Zana,

gjë që më udhëheq nga verbëria në dritë,

ndjej këtë sfidë

këtë ikje intriguese,

ndjej si një sfidë, ndaj pyes në të vërtetë,

a është e gjithë kjo memorje në jetë?


Zbres mendimin tim nën kupolën lehonë

në këtë pamje mister të një foleje metalike

prek barkun e çeliktë me barkun imitues

inspektoj trupin me përpikmëri,

si në një sprovë erotike në dashuri,

përqas ndjenjat e mia

zgjohem nga kjo përrallë

jam gjallë.


Fusha e Vurgut


Ende mbaj aromën e fushës,

jam dashnor i pandashëm i thekave të saj,

si një gjelbërim që hyn në zemër të grunjtë

brenda rrobave të veshura të punës,

duarve që shtrëngoj ende

penelin e memorjes.


Vetëm në këtë memorje

udhëtoj bardhë e zi edhe mes muzgut

dhe ngjyrat hyjnë në një kanavac

mbi të cilat pikturoj

fushën e Vurgut.


Vetëm dje

aty kam qenë një arsye më shumë

me gëzimin e moshës për të prekur gjeografi

duke ardhur e shkuar

duke lajmëruar masën rinore në sy

plot dashuri.


Tani jam

si lulja e zbardhur e fushës

ushqimi i së cilës refuzon këputjen,

nën një diell që mbaron së djeguri poshtë kores

hiri i të cilit

shpërndahet nga era e memorjes.


Memorja këtu është një plug

gërmon thellë vetëm në Vurg.


Sinagoga e Sarandës


Brenda mozaikut lexoj ndoshta atë që hesht,

nëse do t’i bëja pyetjet më të rëndësishme

do të më tregonte guri i dalë në dritë

trupi i të cilit flet

kur arkeologu e godëet me çekiç.


Në të vërtetë, një zë i lashtë gjëmon nga shpirti

vetëm ai mund të tregojë

çfarë i fsheh vetes,

ëndrrat më shumë sesa lutjet,

vetëm atëherë do të vinte koha

të gjenim fatin e harruar

dhimbjen që ka ndjerë Bota.

Nëse kërkojmë përkundër dhimbjes,

kujtime, dashuri të flaktë,

që gjendet në Sarandë në të gjitha rrethanat

do ta përshëndesja me këto fjalë:

për shpirtin e tillë bien këmbanat.

78 views0 comments

Shkrimet e fundit