SHTATË MOTIVE POETIKE

Poezi nga Kozma Gjergji

(Disa janë të publikuar në Itali në antologji të ndryshme)

VENECIA

Qytet i ndërtuar mbi ujë

E pikturuar në qiell

(Mbase nga kjo bart dhe diçka hyjnore)

Ua ka hapur tej e tej

Gjiret dashurorë anijeve e

Gondolave ngarkuar me lumturi.

Çdo urë, katedrale, ndërtesë, ku

Shekujt kanë lënë portretin

Dhe gjithë thesaret e mënçurisë

I mahnit turistët.

Prej tyre dalin

Me maska e veshje karnavalesh

Fantazma, ëngjëj, djaj,

Na argëtojnë dhe

Tregojnë se kush jemi.

MIKU MË I SHTRENJTË

Ç'mundime në detin e trazuar

Gjersa më në fund

Zyra një perlë,

Dhe oh, sa më këndoj hareja,

Por jo, jo,

Hareja më ngriu menjëherë në buzë

Se befas perlën

Ma rrëmbeu

Miku më i shtrenjtë e i besuar

Dhe zuri t'iu mburret të gjithve:

Pa shihni, pa shihni

Se ç'mrekulli kam gjuajtur unë!?

NJË TRËNDAFIL

Një trëndafil mes ferrave!

M'u duk se kërkonte ndihmë

Për t'u rikthyer në kopsht.

Mendova ta ndihmoj

Dhe kur erdhi koha e mbjelljes së pemëve

Shkova ta merrja

Por ç'të shoh:

Qe pleksur e lidhur keqas

Dhe ishte ferrëzuar.

BARINJTË

Zgjodhëm të dëshiruarit barinj.

Me këta

Dhe ujqërit ngopen të kënaqur

Dhe delet janë shëndosh e mirë.

TE HABITIN

Të

Habitin

Disa

Sende tepër të shtrenjta

Me

Moskokëçarjen

Për vlerat e tyre!

SI SHPJEGOHET

Si shpjegohet gjithë

Ajo mani e dëshirë

E shpezëve kërmëngrënëse

Për të fëlliqur me glasa

Çdo kulm e majë të lartë!?

VDEKJA

Në vendin tim

Është e vetmja

Gjykatë supreme

Që jep drejtësi

Pa asnjë dallim.

Kozma Gjergji.