Pesë poezi të tjera nga Fatmir Terziu
1. Udhëtimi
Udhëtimi është ëndërrimi i pagjetur.
Të ëndërrosh?
… është dhimbje e vetmuar
sa më larg, aq më afër kësaj kohe
udhëtimi mbetet një mision i pambaruar.
Asgjë nuk të mban për kaq gjatë
në fillim ëndrrat,
pastaj zgjimet,
ditët thurin hallin
dhe netët tresin mallin e thurrur
koha kujdeset për udhën tonë
dhe pendohet për gjysmën e humbur.
Ne duhet edhe të presim, duke ëndërruar
vizionin e udhës që na frymëzon
udhëtimi është sharmi i një bote të brendshme,
pas kësaj dashuria që na bashkon
do të jetë udha e përjetshme.
2. Rotacioni
Dy pika shiu i ngrin Dimri
nën re për të soditur errësirën
dhe muzika e shiut
lajmëron me sakrificën e tyre një sezon të ri,
pirgjet kremosin fytyrën
me nusërimin e Pranverës
dhe lulet shkruajnë me rënien e gjetheve
trendin,
sekretin e Vjeshtës
se nuk e njohim më njëri-tjetrin.
3. Liria
Zërat tanë janë streha jonë e vetme në udhën e pashkruar
le të hapim në fillim kapakët
pastaj le të thajmë një oqean me lotë
le të ecim,
le të udhëtojmë të lirë
t'i japim fund ndarjes në botë.
Pastaj le të shkruhet fundi i një beteje,
si Muri i Berlinit
mes meje dhe teje.
4. Tradita
Le ta quajmë një arterie ushqim i mishit
një nevojë për një ditë të pastër,
një lindje fjalësh,
agimi i shpirtit.
Ne kemi nevojë për shtëpinë e butë me tymosje oxhaku.
Të ecim pranë mureve të saj në tokën e falur
nga stërgjyshi,
nga gjaku.
Ne vendosim që kjo është diku
mund të gjejmë atje strehim
dhe biem në flirt,
ne kërkojmë aty një kuptim,
në traditë.
5. Ikja
I përket lutjeve.
Një sy që mbyllet
një sy që kopjon
shijen e lotëve
fjalëve dhe ideve në sinkron.
Dhe kështu, kjo lidhje e pandashme
e ndjeshme,
ka nevojë për të folur, për të folur vetë,
për të rrëfyer veten, për t'i hapur udhën Tjetrit.
Ikja është një melhem dinak.
Ajo nuk është shpirti i saj binjak.
Ajo është një shprehje ndryshe
hap pjesën e panjohur të qenies
ikja është vetë kura,
e derdhur verdhoshe në një pellg drite
të skalitur nga lëkura.
Comments