Një “libër” për të dy tipat: për pesimistët, dhe për optimistët

Një “libër” për të dy tipat: për pesimistët, dhe për optimistët

Fatmir Terziu

Sqarim

Një biznesmen shqiptar, i suksesshëm i fushës së ndërtimit në Britaninë e Madhe, me një edukim universitar në Atdhe, krejt papritur, më pyeti para disa kohësh, se cilin libër duhet t’i rekomandoja për të lexuar një miku të angazhuar „keqas“ me politikën shqiptare dhe që ishte në depresion, ose në kondita të tilla të ngjashme, pasi ishte bërë mjaft pesimist për të sotmen, dhe madje as nuk mendonte më për të ardhmen e tij.

Biznesmeni, është mjaft inteligjent, dhe mënyra se si e realizoi pyetjen ishte mjaft inteligjente me një pyetje po aq inteligjente. Unë ndalova menjëherë ti përgjigjem pyetjes së tij, ti jepja një të mundshme të duhur, sikur kjo të ishte kështu kaq thjesht, dhe të kisha ndaluar ti jepja atij, pra biznesmenit, nëse unë dhe ai do ta pinim duhanin, një fije shkrepëse ose çakmak për të bërë detyrën në një thithje të rastit “pesimist” të cigares. E pastaj?!

Vetja e “konfrontuar”

Dhe pastaj, po aq papritur, unë e gjeta veten time të “konfrontuar” me termin “lexim dhe lexues” duke u ballafaquar me një “humnerë” që është hapur në mes të kohës së tanishme dhe kohës që më kujtohet gjallërisht si të vrullshme për atë togfjalësh, po aq sa dhe për pyetjen e biznesmenit.