NËNË MOJ...


    NËNË MOJ...

    Nga Sherif Bllaca


    Nënë moj

    Lotin s’mund ta shoh

    Se në zemër më përcëllon

    Tani as këpucët e mia

    Mos i lypë të dera

    Se edhe pa mua

    Ndoshta vjen pranvera

    Edhe më e bukur

    Se herësh tjera

    Nënë moj

    Kush e peshon mallin tim

    E,PO...

    Herë e bukur

    Herë e lirë

    Herë e trishtë

    Herë e mirë

    Herë edhe hekur edhe zingjir

    Hrë gënjeshtër

    Herë e vërtetë

    Edhe kështu

    Të quajtkan jetë

    SA SHPEJT KALOI…

    Në orën time shpejtojnë minutat

    Në zemrën time shpeshtohen rrahjet

    Netët duken të rënda

    Pa mëshirë ikin.

    Dita është hidhëruar

    Pikon lot

    Nuk e di

    Pse tash ora rrahë aq shpejtë…

    E koha afrohet

    Pa pritur

    Këmbët sikur të inatosura

    Ngadalësojnë hapat

    Sytë më mjegullohen nga trishtimi

    Ora

    Gjithnjë tik e tak...

    Qyteti e shtëpia

    Sikur nuk më flasin

    As nuk i shohë

    As s’mund t’i prekë

    Mbeten atje

    Atje ku ishin e ku i lash…

    Nuk di kur do kthehem përsëri

    Kafeja e mëngjesit loton

    Karrige e zbrazet mbetet kujtim,

    Mirë u pafshim

    Mirë u takofshim shtëpia ime e dashur

    Qyteti im

    Po të lë me gjethet e vjeshtës mbuluar...

    NË LIBRIN TIM

    Këto vargje të shkruara

    Lexoni me ëndje e zemër

    Dhe ju lutëm mos i lëndoni

    Se në faqët e librit

    Shkronjat shpesh dridhen

    Nga malli e trishtimi

    Shfletoni ngadalë ju lutëm

    Aty do t’i hasni pikat e lotit

    Të perziara me dheun

    E atdhut tim

    Më këngën për rikthim

    Përherë në përqafim

    KËSHILLA E BABAIT

    Ishte i shtrirë në krevat

    Eja këtu afër meje tha

    Dhe mirë dëgjo

    Jam i sëmur tani

    Tetëmbëdhjetë vite në burg shqiponjën e barta në gjoks

    Shqiponjën po e lë këtu

    Për të dhashë rininë

    Dhe, nuk po vdes në tokë të sllavit

    Po vdes këtu në atdheun tim

    Të këshilloj më tha

    Dheun tëndë mos e shitë

    As kurrë mos e tradhto

    Po të larguan dhunshëm

    Betohu të kthehesh prapë

    Atdheu të mos qaj për ty

    Se dritën e parë këtu e ke parë

    Shtatin e rrite këtu

    Dhe vdekjen bëre këtu

    Ky është djepi yt

    Këtu i kishe gjysh e stërgjysh

    Këtu le të jetë edhe varri yt kështu të këshillon babai biro...

    21 views

    Shkrimet e fundit