NË ËNDËRR ME SHËN VALENTININ

Jorgo S. TELO

(Një poezi –dhuratë gjithe miqve në emer te dashurisë)

Me afrimin e ditës më të shenjtëruar

Më zbriti në një ëndërr shën Valentini.

Nata mund të ishte… eh, në të mbaruar,

Avokati i dashuris’ sa qetas hyri…

Dhe në ballë kishte të Zeusit emblema

Kish në shpirt Kupidin*, Erosin** e ndritshëm

Në sy Alkionën*** dhe Kikin***porsi mjellma

Në buzë kish Kaliopin 1) edhe Afërditën 2)

Nuk qe i vetëm atë çast Valentini

Hyjnitë po i rrinin si aureolë.

Edhe pse ishte një fundnatë dimri,

Ma zjarrmoi shpirtin, ma bëri rinor…

Dhe të nëntë muzat (të Zeusit bija)

Të Mbledhura përqark , i jepnin bekime;

E ndihmonin, si të mbrohej dashuria,

Kur asaj i suleshin të zymtat mendime…

Dhe më rrefeu Ati për çastin më kulmor

Kur Perandori dha një urdhër famëkeq

Shpalli një dekret kundërdashuror

Dhe At Valentini u bë mbrojtës vet’…

Në çifte të reja vendosi kurorë

Fshehtas, se gjurmohej egër, mizorisht.

U dënua me vdekje, një ditë ra theror

E Mbeti emblemë në emër dashurish…

M’u rrëfye Ati butesor dhe i zbehtë;

Pse iu përkushtua veçse kryendjenjës…

Veçse dashuria jetës i jep jetë

Veçse dashuria mban çelsat e zemrës.

Si u përshëndetëm… një tufë pëllumbash

Me gugatje erdhën dhe me bardhësi,

Më sollën fllad malesh, sollën blerim fushash

Ç’mëngjes pranveror ai mëngjes i ri.

Një mëngjes që shtigje çel për dashuritë

Pasi zbut dhe motin, lumturon gjithfarë.

I gufmon mimozat, mbi lule derdh dritë.

Ndez adoleshencë , rini e moshëbardhë…!

Më qofsh i bekuar, martir Valentin!

Me ardhjen tënde shporr ëndrrat mizore

Më ardhsh Ti i prushtë në çdo ëndërrim

Më sill dhe lirika, “Kumte dashurore”…!

Jorgo S. TELO

Shkurt, 2011

Disa shpjegime:

*Kupidi = Perëndi e dashurisë

**Erosi = muza e dashurisë

**Alkiona, Kiki = simbolizojnë fuqinë e dashurisë. Për dashurinë e madhe për njëri – tjetrin u dënuan nga një hyjni, duke u shndërruar në mjellma; ndaj jemi mësuar t’i shohim mjellmat e bardha dy nga dy lumenjve e liqeneve…

1)Kaliopi = muza e këngës

2)Afërdita ose Venera = muza e bukurisë