MOS MË PËRGJO KUR JAM NË GJUMË


Thani Naqo

Mos më përgjo kur jam në gjumë,

Fryma ime i mban iso pyllit.

Por ti mërzitesh e kur një rrudhë,

Më gdhend kryqe mes ballit e gjer në cep të syrit.

Mos përgjo rrjedhën e lumit të fshehtë,

Dallgët e shpirtit pse m'i trazon?

Dashuritë nuk plaken në shtratin e vjetër,

Dashnorët s' frikohen kur shkrepëtin e gjëmon!...

Mos më prek me gishtat e trembur,

S’ është kjo nata e ëndrrës së keqe.

Thonjtë rriten e flokët mbeten pa krehur,

Edhe atje,ku s’të përkëdhel kush e as flet me vete.

Në gjumë të trazuar mos dëgjo ç’them,

Tempulli i dashurisë mban portën hapur.

Më mbaj për dore që unë mos bredh,

As me ndonjërën që sa ti më ka dashur.

2014

7 views

Shkrimet e fundit