Mihal Gjergji: PREHRI I PERËNDIVE

PREHRI I PERËNDIVE

Pikturë me ngjyra ylberi

E varur në qiellin gri

Si s’mundi t’a shihte Homeri

Të derdhte në vargje magji!

Me male, që flasin me zotat

Të sertë e të thinjur qyshkur

Lumenjtë që fryhen nga lloha

Korije me lisat gjithë nur’

Gëlltisin e s’ngopen humnerat

Dhe jetë, dhe shira pa fund

Oh, ç'tinguj violine bën era

Kur vjeshtës argjendin ja shkund!

Ca varre të strukur ndanë udhës

Më presin të çmallem me ta

Të bëjnë pak vend brenda muzës

Se jeta dhe dhimbjet i ka

S’ndjej zëra fëmijësh. Ç'ka ngjarë?

Ç’burime zhgënjimi kanë pirë?

Jo vdekja, harresa ka vrarë

Dhe ende po vret pa mëshirë!  

(Kurvelesh, Qershor 2018)