Mares i gjyshit, më fal!...
- nipit, që s’mund t’i shkoja dot për datëlindjen, kur mbushi 6 muajsh -
Albert Habazaj
Si na u shtruan në vatër
Shirat e shtruar të prillit,
Tre prilli hap sytë e kaltër,
Ka Ditën e lindjes Nipi.
Princi ynë mbush gjashtë muaj,
Gugat sa qesh Universi.
Si ëndërr të njomë e zgjuan,
Gonxhe e çiltër mëngjesi.
Cicëron si zog i shkathët
Në mikrobotën me lodra,
Ajo gurgullimë e pastër -
Rrjedh ëmbël në fusha, kodra.
O mjalti i mjaltit tim,
E do për vete gjithçka,
Si Mares ku ka shërim
Kur nis, thot’: “ O ba!”, “O ma!”...
Për gjashtë muaj, i plotë viti,
Plaç “Coronë...!” Unë jam në mal,
Për Mares urimin gjyshi
Nis nga qelqi digjital.
Unë jam dhe nuk jam në mal,
“Corona...” keq më mërziti,
Mares i gjyshit, më fal!
Në Tiranë s’erdhi dot gjyshi...
Vlorë, Ujë i Ftohtë ,në shtëpi (karantinë)
E premte, 03.04.2020, ora 16:30’
