LUFTA TROJANE BRENDA KOKËS

Vullnet Mato

LUFTA TROJANE BRENDA KOKËS

Mbrëmë, brenda mureve të kokës sime,

bëhej luftë, si në kështjellës trojane të Palestinës.

Gjithë akejtë e tregut, kishin qiellëzuar çmimet,

sapo kali i drunjtë rus, hyri në portën e Ukrainës.

Tregu ynë është aparaturë e lëkundjeve sizmike

pak tronditje, në tregun e botëror të shtrenjtuar,

çmimi arrin qiellin, si të jetë një raketë kozmike,

dhe gjithë vlerat e tjera, e ndjekin pas, pa vonuar.

Hekuba ime, u kthye mjaft e pikëlluar nga pazari,

se mikenasit e babëzitur, ia zbrazën kuletën krejt,

për pak barishte, spinaqi, preshi dhe panxhari,

sikur bleu desh me brirë, kërcyer nga dheu përpjetë.

E frikësuar nga zemërimi im, për boshatisje kulete,

ajo mendoi, se unë, Priami, do bëja sherr për karota.

Megjithëse i thashë:“Paratë na marrshin të keqen!”,

tërë natën gjëmimet, më shpërthyen tym nga koka.

I vrarë egërsisht, nga kujtimet e pensionit të vjetër,

kundroja dhimbshëm Hekubën dhe mjerimin në kuzhinë,

se gjatë ditëve të ardhshme, deri në mini pensionin tjetër,

kështjella e kokës, do më bëhej gërmadhë lufte në Ukrainë...

Megjithatë edhe pse me kuletën zbrazur nga qindarkat,

dhe pa i konsumuar sa duhet në gojë, protezat dhëmbë,

ne me kockat tona tradicionale, të qëndresave të flakta,

jemi kurdoherë gati, heroikisht, të shuhemi në këmbë!...