Lëndinë malli

Lëndinë malli

Fatmir Terziu

Lëndinë malli do të mbetet një varg. Pena

do të ngjyhet në mushtin e blertë,

në rrrënjë identiteti,

guri që bluan vetëm bereqet,

prej toke të situr lehtë,

poshtë një gërmimi të një lopate,

skicimi me laps,

koha e largët,

gjuha e dritës,

do të bëhen poezi e gjallë.

Çdo fjalë do të ngjyhet përfundimisht,

me petale trëndafili,

erë borzilok do të mbajë bajraku,

ku marin erë të gjithë poetët,

lëndinë shkrimi prej meraku,

bahçe, ose lulishte

ku thithin nektar bletët.