Kristo Çipa: NËSE MES QESHJES JAM I LOTUAR!…..

Nëse kam humbur ndonjëherë

Në shkretëtirat me dëborë,

Me rrjetën-rërë më ka mbështjellë

Sinqeritet i rremë femëror!

Nëse si pupël jam tronditur

Nga llavë e shpirtit zemërak,

Nëpër humnera i llahtarisur

Intrigë e femrës më kap si lak!

Nëse mes qeshjes jam i lotuar

Dhe neps-nepërke pi për mëngjes

Kjo thikë e femrës së xhelozuar

Të ngulet thellë por nuk të vdes!

Sa herë vdekja është nisur

Të më rrëmbejë si pren, skifteri

Një sy i bukur i qëndisur

Më ka kthyer nga rrathë ferri.

Dhe më ka zbritur në botë- mëndafsh

O syri i bukur, kurrë mos më qafsh!