KAÇAKSHE
baladë
Jam kaçak,
kaçakshe po vij,
natës pa hënë i çaj shtegun symbyllur.
Duk-duk reh zemra nën gunën gri,
do rrëmbej dashurinë e kyçur!
Tëposhtë shtyj,
që nga koria,
mjegulla qorre derdhet mbi fshat.
Lehin e skërmiten qenëria:
"Ky është ujk,
ose,
kaçak!"
Kaçak jam.
Kaçake e ti,
hiç mos qaj.
Pse derdh lot?.
Shtëpia e dhirtë na nxe të dy,
kaçakshe jetohet kudo në botë.
Hajt,
eja,
mos ki frikë,
në na qëlloftë Zeusi me zjarr,
për hatrin tënd i zë pritë,
rrufetë ia shuaj,
e bëj manar.
Hajt,
të ikim,
pa çelur dita,
kaçakët jetojnë në terr e mjegull.
Në lakmofsh qytetet me drita,
kaçakshe,
sërish,
do vij fshehur...
2011
