Kërkim vlerash



Astrit Lulushi

Varfëria në mendje zë pritë,

mjerimin në nevojë pret,

si në një stacion qëndror

ose në shtëpi, në shtrat

me njerëz mbi kokë,

disa me virtyt

të tjerë të shtirur

ose dembelë.

Në rrezet e lira të diellit

ose në burimet e thjeshta të hijes

me rrënjë dhe lule,

aty ku me dorë

shkulen nga mendjet

pasionet njerëzore

që çelin virtyte,

natyra prishet dhe

zemra bëhet gur,

njeriu s’njeh as gëzim, as pikëllim,

por ndjen vetëm forcën false

pasivitetin aktiv,

që brohoret mediokritetin

dhe i bën mendjet servile.

Virtytet avancojnë

me veprime të tepërta

me akte të guximshme

maturi të gjithanshme

madhështi të padukëshme,

dhe me atë virtyt heroik,

për të cilin lashtësia

nuk ka lënë emër,

por vetëm modele;

kthehu te qeliza e përgjumur,

zgjoje, gjallëroje atë

dhe kur të ndriçosh veten,

mëso se cilat janë ato vlera.

0 views

Shkrimet e fundit