Gjithmonë je e para…


Lirije Rasha

Gjithmonë je e para…

-Dedikim këngëtares brilante Lirie Rasha-

Nga Gëzim LOKA

Kënga të përkundi

Nëpër shtigje drite

Kënga të dha krahë

Me këngën u rrite…

Skenat ku këndove

T’u bënë aureolë

Nga fillim i rrugës

Gjer në kohën tonë.

Si ortek dëbore

Majës në Kunorë

Hiret pranverore

Tinguj përrallorë.

Zëri yt brilant

Fëshfërimë gjethi

Hënën edhe yjet

Netëve seç i ndezi.

Kënga të udhëhoqi

Në shtigjet e zemrës

Yllnaja e krojeve

Fllad i jepka ëndrrës…

Zall-Dardha e bukur

Ta bekoi talentin

Pas këngëve të tua

Vetë epokat rendin…

Dibra me Nëntë Male

Ty ta rriti shtatin

Kënga që kur nisi

Kurrë s’e ndali hapin.

Ylberet në qiell

Ty t’u bënë urë

Për artin magjik

Nuk u lodhe kurrë…

Fushës së Korabit

Lëndinave alpine

Nën hije të malit

Ndjenjave intime.

Liri e ke emrin

Në gjak ke lirinë

Zëri yt tribunë

Hymn për dashurinë.

Zëri yt jehonë

Në gryka e male

Që kur në udhë dole

Hapin kurrë s’e ndale.

Gjer në Amerikë

Zëri të buçiti

Në çdo vend e skenë

Balli ty të ndriti…

Ti i bën lulet

Të çelin janarit

Ti e bën hënën

Të dehet nektarit…

Ti e bën njeriun

Ende më të mirë

Zëri yt brilant

Porsi xhevahirë…

Rrugët ku ti ec

Ta bekojnë hapin

Tingujt diellorë

Mjegullnajat hapin…

Vargu nuk mjafton

Nuk mjafton poema

Pas këngëve të tua

Nëpër vite renda…

Brezi im u rrit

Me këngët e tua

Bukurinë hënës

Ia more hua.

Do të ikin breza

Koha duke rendur

Në saksitë e zemrave

Këngët të kanë çelur…

Këngët udhëtojnë

Bashkë me ty ndër mote

Zëri yt ujëvarë

U bë zë epoke.

Mos pushoftë kurrë

Liri, kënga jote

Në behare zemrash

Në përplasje shqote.

Nga Dibra n’Tiranë

Nëpër shqiptari

Kënga jote shpresë

Mall e dashuri…

Kënga jote mal

Mal mbi Nëntë male

Nëpër shtigje arti

Furtunën e ndale…