Gëzuar Ditën, i shtrenjti Baba!
Fatmir Terziu
Sot u përhumba mbi një album
kërkoja për status tek fotografitë
të gjitha dukej më ngjanin shumë
herë pas here i fshija sytë…
…diku syri u tret enkas vetvetiu
goja, faqet, koka, vetullat, rudhat
edhe kur isha ai djaloshi i riu
të gjitha i kisha huazuar nga të tuat.
Mbi fotografinë bardhë e zi
vetëm syri shkonte më larg
se ndryshe në album ne të dy
do të duhej aparat të na ndaj.
Baba më duhet të kërkoj ndjesë
“gabim” kisha bërë në të gdhirë
në mendje ka mbetur kjo kujtesë
kujtova se mbeta në pasqyrë.
E kështu i shtrenjti baba tani
je status në Facebook tek unë
fëmijët më thonë me habi:
“me gjyshin, o Ba, ngjan shumë”.
