Fatmir Terziu: Për një zgjim më të mirë

Miq ju përshëndes! Si gjithnjë ju falenderoj nga zemra, dhe me disa poezi të shkurtra, ndoshta në vend të disa fjalëve të urta. Ose thjesht në të gdhirë, me disa Poezi për një zgjim më të mirë:

1.     PËR KOHËN

Produkt? Ndoshta është më i veçanti,

tregu i vetëshitjes si nënprodukt i vetëlëndimit,

derisa të bëhet art.

Ja pse i mbyll buzët,

nuk pështyj lart.

2.     VARG ME VARGJET

Këputje e mesme. Tel në vend të spangove,

rrobat terren në terrjen e trishtuar të një pusi,

nëse duart do të zëvendësoheshin nga veprimi,

nëse veprimi do ti zëvendësonte duart,

trupi ndoshta do kuptonte më mirë erën e djersës,

varg mes vargjeve.  

3.     FISI

Cigarishtja e gjyshit

dhe cigarja e zverdhur në fotografi

dy humbjet më të mëdha të fisit

mes albumit të grisur në fëmijëri…

Ëndrra ime, cigarja ime, ka një tym kaq të shkurtër

nuk mund të luaj rolin e lotit,

por shtrëngohet.

4.     TRASHËGIM

Specat djegës

shtypen në thesin e kujtimeve,

dhe në faqe turpërohen kur nxjerrin farën

e bardha djeg kujtimet

pa paralajmërim.

5.     PËR FËMIJËRINË

Ndërsa lidhim sandalet me duart e nënës,

gurët mes gishtave,

kokrrizat e rërës si zogj në mesin e krimbave,

mbarojnë ankimimin,

gjithçka do të jetë në rregull,

por jo në pleqëri.