top of page

Edhe ...




Edhe unë jam Njeri

Fatmir Terziu


Edhe unë jam Njeri, edhe unë

edhe unë jam si Ty, edhe unë

ndjenjat më dalin nga buzët e mia si mjaltë

e vështirë për mua për të hedhur baltë.


E kam thënë këtë ndoshta njëqind herë

Unë jam si Ti nga kjo botë reale, jo fiktive

dua të ngrij brenda heshtjes sime të thellë...

nuk jam një zgjua i mendimeve negative.


Ndjenjë e kyçur në thinjën e pandërprerë

në rënien e zbardhjen e flokëve të lirë

kur i ledhatoj, mendoj se do t’i kem përherë

vazhdoj t’i mbaj në sojin e tyre më të mirë.


Ti krihesh sikur ndodh në syrin tim

derdh flokun gjerë e gjatë në pasqyrë

unë harroj që është vetëm një vegim

nga koha kur ishim shokë të mirë.


Të lexoj sikur dihamat në qelqin bri

i hutuar pakuptueshëm vetëm me ty

harroj për një çast se të kam në sy

në mendje një album me fotografi.


Gjerb ekspresin e lëngët në porcelan

në qelqin kristal me avull kafeneje aty

buzët mbi ty natyrshëm bëhen palë

nën thinja të bardha të ndjekin dy sy.


Dhe ndoshta dëgjoj një fjalë të paqartë

zhurmërat shuhen me vegimin që rend

rinoshi i pamatur ndoshta hedh baltë

nuri yt nuk njeh moshë ende të çmend…


…dhe kthej kohën pas si të jetë fletore

udhëtoj me mendje, me ndjesi e me sy

më gjan se ende jemi dorë për dore

diku në atë memorje që zbardhet aty.


Edhe unë jam Njeri, edhe unë

edhe unë jam si Ty, edhe unë

edhe kur flokët zbardhin kokën time në fakt

ndjenjat ngjysin mjaltë në fytin tim si zamkë.

37 views0 comments

Shkrimet e fundit

fjalaelireloadinggif.gif
bottom of page