DY POEMA PËR FËMIJË


Faslli Haliti

DY POEMA PËR FËMIJË

EROLA

Erola përqeshi

vëllanë

e saj,

gjuhën i nxori

si spece me majë.

Ia bëri: me-me

Vëllait

si kec,

por gjuhën mamaja

ia dogji me spec...

Gjuha i dogji,

sa nisi

të qajë,

vajti në çezmë

me ujë të lajë.

Por gjuha i mbeti

si spece

e kuqe,

që shoqet ta njihnin

si vajzë me huqe.

* * *



Përqeshi Erola

një shoqe

të mirë

gishtat i vuri

në kokë si brirë.

U bë porsi dhi,

si dele,

si cjap,

erdh ujku nga pylli

ta hante me vrap.

Dhëmbët e ujkut

Erola

sa pa,

nisi të qajë,

me lot u la.

Dhe deshi të mbrohej

me brirët

e saj,

por brirët nuk ishin

dy thika me majë.

Me çifte erdh babi

dhe ujkun

e vrau,

kokën përgjysmë

me plumba ia ndau.

** *

Përqeshi Erola

dhe motrën

një natë,

ia bëri ga-ga

Kleanës si patë.

Krahët sa rrahu,

dhe bëri:

ga-ga,

veten me pupla

të veshur e pa.

Kur puplat i dolën

dhe sqepi

me majë,

dhelpra me vrap

erdhi ta hajë.

Sheh dhëmbët e dhelprës,

tmerrohet

nga frika,

derdh lotët Erola

si qelq, pika-pika.

Po babi me çifte

dhelprës

i ra

dhe koka e dhelprës

përgjysmë u nda.

Babi e rropi

Dhelprën

menjëherë,

lëkurën e vari

të thante në erë.

Mamaja lëkurën

e bëri

pellush,

ia vuri Erolës

për dimër në gushë.

Kur shoqet ia panë

lëkurën

bojëkafe,

e tallen Erolën

si dhelpër dinake.

Erolës i erdhi

aq keq

sa nuk ka,

kur tallja papritur

mbi kokë i ra.

Nuk tallet Erola

me shoqet

më jo,

se shoqet e duan,

i do dhe ajo.

MOTRAT

Mami ish sëmurë,

dridhej,

kishte ethe,

këmbët i kish akull,

duart si dy gjethe.

Lola, Genta, Krisa

pas lojës

u harruan,

për nënën e tyre

fare s'u kujtuan.

Lola, Genta, Krisa

erdhën

në shtëpi,

të trija me etje,

me djersë dhe uri.

I pa mami vajzat

me djersë

në ballë,

në vend të qortimit,

nisi një përrallë:


Bleta, Merimanga

dhe Gjinkalla

pra,

na ishin tri motra,

të mira sa s'ka.

Motrat të trija

na kishin

dikur

një nënë të vetme,

që dergjej sëmurë.

Një ditë në ethe,

ashtu

në kllapi,

kërkoi nëna vajzat

t'i kishte në shtëpi.

Bija Merimangë

po thurte

pëlhurë

kur i vajti lajmi

që nënën, kish sëmurë.

Ku e gjeti nëna

të sëmuret

sot,

unë po end pëlhurë

pëlhurën s’e lë dot.

Dhe vazhdoi Merima,

punën

nuk e la,

për lajmin e hidhur

të fikët s'i ra!

Thërritni, tha nëna,

bijëzën

Gjinkallë,

ajo do më vijë

me lot edhe mall.

Gjinkalla këndonte

mes vapës

në drurë

kur i vajti lajmi:

që nënën kish sëmurë.»

Ku e gjeti nëna

të sëmuret

sot,

unë po këndoj,

këngën s'e lë dot.»

Gjinka moj bija,

vazhdoi

të këndonte

edhe kur mësoi

që nëna lëngonte!

Dhe vazhdoi Gjinka,

këngën

nuk e la,

për lajmin e hidhur

të fikët s'i ra!

Thërritni, tha nëna,

bijëzën

e tretë,

bijëzën e vogël,

që ma quajnë Bletë!

Bleta po gatuante

dyllë

edhe mjaltë

kur i vajti lajmi:

që nënën kish në shtrat.

Bleta la gatimin

e pikëlluar

shumë,

dhe u nis në çast

me duart me brumë.

📷

Mbi blire dhe lule

Bleta fluturonte,

lulet derdhnin

mjaltin,

Bleta s'i shikonte.

Se s'pyeste Bleta

për dyllë

dhe mjaltë,

vraponte te nëna

që dergjej në shtrat.

Erdhe, bija ime?

tha nëna

e shkretë,

kur pa para syve

bijëzën Bletë.

Erdha, nënë e dashur,

pa më thuaj

ç'ke,

si ndihesh, moj nënë,

moj nënë, si je?

Sa më qenke lodhur!,

tha nëna

me mall,

kur Bletëzën e pa

me djersë në ballë. –

Dhe duart i paske

me miell

dhe brumë,

po pse të nxitoje,

moj bijë, kaq shumë? –

Po nëna po dridhej,

nëna

kishte ethe,

duart i kish akull,

të verdha si gjethe.

Që t'i shuhej zjarri

duhej pak dëborë;

Bleta

fluturoi,

e mori në Tomor.

Mbi ballin e nënës

që digjej, përvëlonte,

i vuri

një leckë

lecka avullonte.

Një lule këputi

bijëza

Bletë,

e mbushi me mjaltë

për nënën e vet.

Dhe bëri me ngut

një kafe

me mjaltë

për nënën e dashur,

që dergjej në shtrat.

Nëna piu kafen,

shurupin prej mjalti,

u çel

në fytyrë,

u çua nga shtrati.

Kur i shkuan ethet

dhe zjarri

i ra,

bijëzës së vet

nëna na i tha:

Kur të thirra ty Bletina,

Më erdhe

me nxitim

mjalti yt u bëftë

për njerëzit ushqim ! –

Mamaja përrallën

sapo

mbaroi,

secila nga vajzat

mjaft drejt e kuptoi.

Dhe bijat të trija

për mëmën

e vet

u bënë secila

si bijëza Bletë...

Lola lagu leckën,

ia vuri

në ballë,

Gentiana i lidhi

mamasë një shall.

Krisa i bëri

mamit

menjëherë

një kafe të fortë

me pakëz sheqer.

Kur ethet i ranë

dhe zjarri

i ra,

vajzave të trija

mamaja u tha:

Ejani te mami,

ejani,

moj bija... –

Dhe mami në ballë

i puthi, të trija.

#Faslli #Haliti

9 views

Shkrimet e fundit