Nga Petrit Malushi
Në tënden ditë, Shen Valentin !
Në tënden ditë përzgjidhen lulet,
Jo për t’i thurur gërshet, kurorë.
Nuk shkon askush të përulet
Tek të ikurit për përvjetorë.
Mijëra zemra lule përcjellin,
Mijëra zemra lulet i presin.
Gonxhet brenda fshehin diellin,
Nëpër petale simbolet mbesin.
As tufë bashkë nuk i mbledhin
Që një datëlindje ta urojnë.
Dasmave, lart në ajër s´i hedhin,
Fatin beqarët ta gjurmojnë.
Flori e zjarr shkëlqen kjo ditë.
Mesazhet varg, fjalë zbukuruar,
Përbetime kaluar në sitë.
Kush thotë që s’janë të koduar ?!
Adoleshentë, të rinj, të rritur
Dhe të moshuar flokëdëborë
Rendin, shkruajnë si të roitur,
Të përvëluar, besnikë, dashnorë...
Në tënden ditë Shen Valentin
Dy zemra lulet, simbol dhuratë
I kanë vetëm për dashurinë,
Endërrime dhe lutje për fat.
Dhuratë për Shën Valentin
Për ty, më të shtrenjtin suvenir
Të kërkoja, nuk renda shitoreve.
Vargjet me rimën më të mirë,
Nuk u lodha t’i gjeja fletoreve.
Nuk prenotova luksozët lokale
Ku shërbehet me përulësi,
E në krahun tënd me lumenj fjale,
Të t’përbetohesha për dashuri.
Për lulen me më të ndezurën ngjyrë,
Aromëpërhapëse pa mbarim,
Livadheve vrapova, në natyrë.
Dhuratë ta bëra për Shën Valentin.
Mëkatari
Dy lule porosite për dhurata,
Dhurata, dy në një ditë.
Njëra, perde e zezë si nata,
Tjetra, mbulesë për djallëzitë.
Dy lulet, të shkretat s’e dinë
Ç’fsheh ti në shpirtin e zi,
Kurorëshkelës, që në Shën Valentinë
Dhuron lule për tradhëti.
Comments