Dhivër


Dhivër

Nga Fatmir Terziu


Hap faqet në një libër

vargu më sjell engjëllin

dhe zogjtë që këndojnë në Dhivër.

Ndjek vargun,

fjalët,

gjuhën e ndjeshme të shpirtrave,

pemët,

gratë e thjeshta, nënat mes dy gjuhëve,

kujtimet intime,

lirika të tretura natyrës së tretur mes syve,

ngrirë në britma dhe vajtime.


Mes librit pashë rrugët, erën e thekët,

lutjet e një mjedisi të përshpirtshëm,

gara me lojërat fëminore,

fëmijë të pafajshëm.


Dhe e ktheva menjëherë librin prapa

në kohë tjetër,

me penën e poetit Kiço Papa,

isha përhumbur si metaforat mbi letër

ky është Dhivër,

si janë gjërat, më tregon për tokën,

zjarrin, tymin, hijet, aromat,

ndërsa midis kësaj kohe Korfuzi

më rikthen në një pyetje të heshtur,

ku ngjizen mes vetes dashuritë,

deri në Amerikë,

me qëllim, nuk pyeta

për shtëpitë.


Kafe tek Limani


Diçka mbetet më se e ndjeshme

kur rrëkëllej këtë filxhan të kafesë

tek Limani.

Mendja lëviz si një dallgë që kolovitet në ajër

nën shtypjen e një varke

endet për të vizatuar imazhin e fytyrës së ujtë

dhe tendosjet e këmishës sime

copat e tendosura të blusë që pi

dhe çka nëse dua të pi kafenë nga ai filxhan

joshur nga stërkalëzat e gëzuara të detit

në Liman,

gjurmë të lehta të parfumit të joduar,

në fytyrën e dashur që kam pranë.


Dhe çfarë nëse ajo do të buzëqeshë?

Po puthnim detin

ashtu si isha drejtuar për të fiksuar foton e saj,

duke rrëkëllyer kafenë nga filxhani

tek Limani.


Kurse sytë e mi bëhen katër

të mësoj të fotografoj si ky det i kaltër.


Nën themelet e një hoteli në Sarandë


U flas syve.

Gjuha flet me heshtjen e tyre

harresa

dhe asgjë më shumë,

se kapakët e mbuluar me pluhur

të kësaj historie.


Në themelet e një hoteli.

heshtja qëndron te burimi,

përsëri ngërç në rrënjët tona.


Në themelet e një hoteli,

nën beton,

shfletoj mes heshtjes historinë e dhimbshme

të racës sonë.

31 views0 comments

Shkrimet e fundit