BISTAK TË VYSHKUR ËNDRRASH
- Prof Dr Fatmir Terziu
- Jun 12, 2022
- 2 min read
Koleksion poetik nga Kozma Gjergji
DRURËT
Ndërsa furtuna e dëborës
Pishat i shndërroi
Në vela të bardha
Në pyllë erdhën
Të gjithëfuqishmit, sharrëtarët.
Drurët që trimërisht qëndruan
Nuk më ngjajnë me ca njerëz
Duarngritur drejt qiellit
Tek rrëzohen me gjëmim
Në prehërin e tokës
Që i rriti.
Kjo kurrësesi nuk është rënie,
Drurët përsëri do të çohen
Në direkët e anijeve
Që ndërtuan detarët në Durrës,
Me tufanet
Do luftojnë dhe ecin
Duke ngritur lart në qiej
Krenarinë e tyre prej pishe.
(Nga cikli i botuar në revistën "Nëntori"1982)
NË VENDIN TIM
Në veri më vjen dëshira
Të lindem,
Në qendër më kap dëshira
Të rritem,
Në jug më zë dëshira
Të plakem,
Në…
NDOSHTA
Ndoshta pa terrin
Dritën
S'do e çmonim
Kaqë shumë.
Ndoshta pa të ftohtit
Zjarrin
S'do e donim
Kaqë fortë.
Ndoshta pa…
BISTAK TË VYSHKUR
Në dritaren
E zbukuruar
Me thupra hekuri
Si kafaz
Flladi tund
Bistak të vyshkur
Ëndrrash.
DIELLI
Iu vuri flakën
Xhamave
Të më dalësh
Një çast
Në dritare.
E DASHURA
Lodhjen
E rrugës së largët
E dashura
Ma hoqi shpejt
Si të fshinte
Pluhurin nga xhamat.
NJË SHELG
Një shelg me thinja ngrice
Përkulur mbi lumë loton
Teksa shikon
Në pasqyrën e ujit
Portretin e vet të plakur.
NËNË!
Në përleshje me flakët
Për të mposhtur fontanën
Vetëtimthi kujtova
Fëmijtë,
Gruan,
Miqtë,
Shokët
Dhe s'di pse të fundit
Përmenda nënën!
Kur rastësisht
U godita në këmbë
Të parën nga fjalët
Thashë: Nënë!
(Nga cikli i botuar në g."Zëri i rinisë"1980)
KAU PLAK
Mendueshëm
Përtypet ngadalë
Dhe vështrimin e vërdallisë
Tej fushës, ku për vite
Hapat e tij shkruan
Poemën e madhe të punës.
Tashmë i lodhur, i mundur
Mbase sjell ndër mend
Atë demin e pabindur
Të rinisë së vetë,
Sesi me të rrahur
Dhe përkëdhelur
E mbrehën në parmënd,
Duke ia varrosur
Lirinë përjetë.
Mendueshëm
Përtypet ngadalë
Në një heshtje që flet,
Ndërsa pronari
Bën pazar me kasapin…
FSHATI
E morën gjithë
Prodhimin e fushës
Kamionët e babëzitur
Të shtetit socialist
Dhe lanë pas
Re të mëdha pluhuri.
Shtëpitë e fshatit
Si varrezë e shkretë
Heshtin tronditshëm,
Netëve dritat e tyre
Ndriçojnë mekur
Si sy të verbër.
Mik i nderuar z.Sotir Athanasi, ju përshëndes dhe u jam shumë mirënjohës për mendimet e vlerësimet rreth poezive, që tek unë shndërrohen në gëzim dhe shtysë e re.
Jeni vetë krijues dhe e dini mirë sesa i nevojshëm është gjykimi apo analiza veçanërisht e kolegëve të kultivuar si ju, që shquhen për "prodhime" me cilësi .Ju falendoj me respekt për angazhimin e vazhdueshëm.
Me konsideratë, K.Gjergji.
Xingografia:
Miku im, KOZMA!
Je një poet i spikatur në lëmin e ndritur nga metaforat përveç se origjinale edhe të ngarkuara me ndriçime. . ., galaktike. Vënde-vënde ato janë alegorike si edhe filozofike, larg hermetizmit. Të kapëshme nga kushdo. Kjo tufë poezish të ngazëllon dhe të bën t'i rikthehesh leximit me një vëmëndje e përqëndrim për t'a rindjerë edhe një herë dhimbjen e autorit për Kaun Plak, për Nënën, Një shelg, E dashura, etj., etj. Fisnikëria e Myslymit, edhe në pak rradhë, i ka qëmtuar me kujdes vlerat e kësaj tufe poetike me një përkushtim, që ne të tjerët, mbetemi larg. Urime, miku ynë Kozma Gjergji!
Xingografia!/ Athinë.
Fort i dashur Myslim, të falenderoj thellësisht për gjithë këto fjalë përplot
dashamirësi e sinqeritet miku dhe prej artisti të lartësive olimpike, të cilat më gëzojnë,
frymëzojnë dhe trimërojnë poetikisht pa masë.
Të përshëndes e përqafoj me mall, K.Gjergji.
' Nje koleksion poetik' nga Kozma Gjergji, nuk me befasoi., sepse Poeti Gjergji eshte ne vetvete befasues. Te habit me konceptimet,me ngrohtesine e ritmit te brendshem, gati muzikor, me figurat e fresketa origjinale dhe metaforat gati te padukshme. Poezia e tij s'ka flluska e tollombace, eshte e virgjer dhe e sinqerte, duke shprehur shpirtin e njeriut dhe misteret e tij.
I gjithe cikli me pelqeu. Do te vecoja poezine 'DRURET', Origjinale, e brishte, antologjike, e paperseriteshme dhe disa poezi te tjera si 'NDOSHTA", "Nje shelg" , "NENA", Nje perle poetike
e cila edhe pse kane kaluar dyzete e ca vite, me ka ngelur ne kujtese, "Kau plak"etj.
Faleminderit i nderuar poet.
Shume urime, Perqafime, Myslim Maska, Athine.